The Silence of the Lambs (filem)
The Silence of the Lambs iku filem Amérikah taun 1991 ajènre horor-triler psikologi sing disutradarani Jonathan Demme lan dibintangi Jodie Foster, Anthony Hopkins, lan Scott Glenn.[1] Filem iki diadhaptasi déning Ted Tally saka novèl taun 1988 sing nunggal jeneng anggitané Thomas Harris. Novèl The Silence of the Lambs iku dadi novèl angka 2 sing kanthi lakon Dr. Hannibal Lecter, sing kaloka minangka psikiater mobyor nanging jebul uga pamati rumanté sing kanibal. Filem iki dadi filem adhaptasi kapindho saka novèlé Harris sing lakoné Dr. Hannibal Lecter. Sadurungé ya iku filem Manhunter taun 1986 sing disutradarani Michael Mann. Ing filem iki, kacarita Clarice Starling, calon pagawé enom FBI Amérikah, lagi golèk wejangan saka Dr. Lecter sing kinunjara nedya nyiyèt pamati rumanté sing ajejuluk "Buffalo Bill".
The Silence of the Lambs dibabar nalika 14 Fèbruari 1991, lan éntuk bebathèn reged $272,7 yuta saka rantaman $19 yuta ing sakubenging donya. Filem iki dadi filem angka 3, saliyané It Happened One Night lan One Flew Over the Cuckoo's Nest, sing menang Academy Awards ing limang babagan: Gambar Paling Apik, Lakon Paling Apik, Sutradara Paling Apik, lan Naskah Adhaptasi Paling Apik. Filem iki uga dadi filem horor pisanan sing menangké nugraha minangka Gambar Paling Apik lan mung ana telung filem sing lumebu nominasi: The Exorcist taun 1973 lan Jaws taun 1975.[2] Filem iki dianggep mentes budayané, sujarahé, lan éstétiké déning Library of Congress Amérikah lan dipilih nedyo diluri ing National Film Registry nalika 2011.[3] Filem lanjutané, Hannibal dibabar kala 2001.
Rujukan[besut | besut sumber]
- ↑ "The Silence of the Lambs". Turner Classic Movies. Dibukak ing March 28, 2016.
- ↑ "15 Facts About 'The Silence of the Lambs' You Didn't Know". Hollywood.com. Dibukak ing 12 September 2015.
- ↑ "Silence of the Lambs added to U.S. filem archive". BBC. 28 December 2011. Dibukak ing 28 December 2011.