Kresnayana Mawi Sekar

Kresnayana Mawi Sekar yaiku serat punika ingkang dipun cariyosaken wosipun lelampahanipun Prabu Kresna nalika ambradat Dèwi Rukmini. Menggah gancaring cariyos makaten.

Dewi Rukmini putranipun prabu Bismaka ing Kundina, sampun kapacangaken kaliyan sang Suntini, ratu ing nagari Cèd; naning ingkang ibu, Dèwi Pretukirti kepéngin kagungan mantu Prabu Kresna. Malah sang Rukmini ingkang dipun pilih pancèn inggih Prabu Kresna. Wasana sareng sampun mèh tempuking damel, sang Suntini kaliyan sang Jarasanda, sami wonten ing Kundhina. Prabu Kresna boten dipun ulemi, nanging dipun aturi énggal-énggal rawuh dening sang Pretukirti saha pengantèn putri. Sareng saweg ramé-raménipun midadareni, pengantèn putri dhedhemitan medal saking nglebet kadhaton, dhateng konten Sri Manganti Kidul, dipun papagen sang Kresna, lajeng kabekta majeng.

Pengantèn kakung saha bala tuwin Radèn Rukma, ingkang rayi pengantèn putri, sami nututi, parang. Radèn Rukma kirang sakedhik kémawon katut pejah kalian sang Suniti. Dèwi Rukmini nyuwun gesangipun ingkang rayi dhatèng Prabu Krèsna. Sang Putri lajeng terus kabekta kondur dhateng nagari Dwarawati.

Cariyos ing nginggil punika yèn wonten ing wayang, dados lampahan Kresna Kembang utawi Narayana Maling: naming sampun kathah éwahipun. Kadosta: pengantènipun jaler yèn wonten ing lampahan wayang, Pandhita Durna, kapangku Prabu Duryodana. Sang Jarasanda kaliyan Suniti wonten ing wayang sirna tanpa lari.