Kagunan Aborigin

Saka Wikipédia Jawa, bauwarna bébas abasa Jawa
Kagunan watu Aborigin ing Taman Nasional Kakadu, Ostrali.

Kagunan Aborigin iku kagunan sing digawé déning wong-wong pribumi Ostrali. Rupané kagunan Aborigin ana warna-warna wujudé kaya ta lukisan ing godhong, ukiran kayu, ukiran watu, yasan reca, busana adat, lan lukisan wedhi. Kagunan Aborigin banget gegayutan karo upacara-upacara agama. Kagunan iki wigati amarga minangka péranganing adat tuwa ing donya sing isih lestari[1], ya iku adat sing dhedhasar totem lan Pangimpèn. Kabèh rerupan sing kalukis utawa kagambar ing watu padha ngemu carita.

Kagunan pribumi Aborigin sing wiwitan wujud ukiran watu, lukisan awak, lan polah dhasar, sing tuwané katitimangsa kawit 30.000 taun kapungkur.[2]

Lambang-lambang ing kagunan Aborigin kanggo nyandrakaké warna-warna bab. Lambang-lambangé sing béda-béda surasané bisa irib-iriban, nanging lambang-lambang sing padha surasané malah bisa béda-béda. Rerupan sing èdi-pèni ing kagunan Aborigin mono minangka sarananing sesambungan sing wiwit ngrembaka 30.000 nganti 40.000 taun kapungkur.

Sawenèh juru kagunan Aborigin ngedol karya-karya kagunané. Ing taun 2007, juru kagunan Pitjantjatjara nama Yannima Pikarli Tommy Watson ngedol lukisané sing payu AU$240.000.[2]

Ing taun 2010, pamaréntahan Queensland mratélakaké yèn sepur Tilt Train cacah loro bakal digambari déning juru kagunan pribumi nama Judy Watson lan Alick Tipoti.[3] Awit sepuré dumadi saka loko cacah siji lan gerbong cacah pitu sing gunggung dawané 185 mèter, karyané mau dadi mahakarya Aborigin modhèren sing gedhé dhéwé.[3] Tilt Train mau lumaku antarané Brisbane lan Cairns.

Rujukan[besut | besut sumber]

  1. ^ "Australian Indigenous art". australia.gov.au (ing basa Inggris). Dijupuk 2017-11-16. 
  2. ^ a b "An Aboriginal art success farewells Sydney". ABC News (ing basa Inggris). 2011-03-27. Dijupuk 2017-11-16. 
  3. ^ a b "Artists Named For Iconic Indigenous Tilt Trains". aboriginalartnews.com.au. Dijupuk 2017-11-16.