Gobag sodor

Saka Wikipédia Jawa, bauwarna mardika basa Jawa
     
Gobag sodor.

Gobag sodor ya iku salah sawijining dolanan ing Jawa kang dilakokaké déning 3-5 bocah. Gobag sodor uga diarani galah asin utawa galasin. Carané dolanan iki ya iku ngadhang-adhangi mungsuh supaya ora nglewati bates garis kanthi bolak-balik, lan salah siji gegrombolan kudu bisa ngléwati garis kanthi bolak-balik ing lapangan kang wis katemtokaké. Dolanan iki lumrahé dilakokaké ing pelataran badminton kanthi garis-garis lapangan kang dinggo pathokan, utawa nganggo pelataran segi papat kanthi ukuran 9 x 4 kang dibagi dadi 6 pérangan. Garis wates saben pérangan diwènèhi tandha nganggo kapur. Gegrombolan kang jaga ing lapangan dibagi loro, ya iku anggota gegrombolan kang njaga garis ing wates mau. Dolanan iki gawé ati seneng, lan rada angèl amarga kabèh sing dolanan kudu lincah lan gesit supaya menang. Tembung go-bag-so-dor yèn diwaca utawa diucapke mirib banget uniné lan uga tegesé karo tembung basa Inggris go back through the door sing tegesé lumaku utawa lumayu "bali ngliwati lawang". Ya pancèn cocog kahanané, nanging apa bener yèn dolanan iki uga padha karo dolanan saka nagara Inggris.