Candhi Wringin Branjang
_-_panoramio_(1).jpg)
Candhi Wringin Branjang ya iku salah sawijining candhi sing manggon ana ing tlatah Désa Sumberagung, Gandusari, Blitar, Jawa Wétan. Candhi iki isih sawewengkon karo Situs Gadungan sing adohé watara 100 m ing sisih kulon Situs Gadungan I. Candhi sing digawé saka watu andhésit iki duwé wangun sing barés. Wewangunaning ora duwé sikil candhi, nanging amung duwé awak lan payon candhi baé, sing dawané 400 cm, ambané 300 cm, lan dhuwuré 500 cm. Déné lawang mlebuné ambané 100 cm, dhuwuré 200 cm lan madhep ngidul. Ing témboké ora ana reliéfé utawa uparengga liyané, nanging témboké duwèni brobosan sing barés. Wangun payon candhi sing madhani payon omah lumrahé, lan diwatara wangunaning candhi iki dadi papan kanggo nyimpen piranti upacara saka jaman Kraton Majapahit ya iku udakara abad kaping 15 M.