Bal-balan gagrag Amérika Sarékat

Saka Wikipédia Jawa, bauwarna bébas abasa Jawa
Larry Fitzgerald (klambi biru) nangkep sawijining pas sing direksa déning Cortland Finnegan (klambi abang) nalika Pro Bowl taun 2009

Bal-balan gagrag Amérika Sarékat iku sawijining jinis ulah raga bal-balan sing dimainaké ing nagara Amérika Sarékat lan uga Kanada. Ing nagara loro iki, olahraga bal-balan iki diarani football utawa gridiron. Olahraga iki ditandhingaké déning tim loro sing sijiné kawujudaké saka pamain sing cacahé ana sawelas. Ulah raga iki dimainaké ing sawijining lapangan pasagi mujur lan ing pungkasané lapangan ing sisih kiwa lan tengen ana cagak sing fungsiné dadi gawang golé. Olèhé main iku, manawa nyerang, tim sing lagi nyerang kudu nyoba maju ing lapangan mlayu utawa ngepasaké bal, kamangka tim sing lagi ngreksa paruh lapangané kudu nahan tim panyerang aja nganti balé tekan buri lan yèn bisa ngrebut balé. Olèhé nyerang kudu bisa maju 10 yard sajeroning patang down (tiba), yèn ora bal kudu diwènèhaké tim tandhingan. Tim bisa olèh wiji mawa nggawa bal tekan zona pungkasan, perkara iki diarani touchdown (demok ngisor) utawa mawa ngegolaké bal ngliwati gawang. Gawangé rupané mèmper porok tala.

Tim sing olèh wiji akèh dhéwé, ya iku sing menangaké tetandhingan.