Admetos

Saka Wikipédia, Bauwarna Mardika abasa Jawa / Saking Wikipédia, Bauwarna Mardika abasa Jawi
Langsung menyang: pandhu arah, pados

Wonten ing mitologi Yunani, Admetos (basa Yunani: Άδμητος, Admetos, "liar", "boten saged kajinakaken"[1][2]) menika raja Ferai ing Thessaly. Admetos nggantosaken bapakipun, Feres. Admetos menika satunggaling Argonaut, Admetos ugi ndhèrèk mburu Babi Kalidon.

Wonten ing mitologi[sunting | sunting sumber]

Lukisan vas ingkang nggambaraken nalika Admetos lan Alkestis pisah.

Admetos menika kondhang awit saking saénipun lan adilipun. Nalika Apollo kaukum setunggali taun kedah ngabdi minangka manungsa amargi sampun mateni Delfin, Apollo mapan wonten ing dalemipun Admetos lan dados gembalanipun. Minangka balesanipun, Apollo ndamel sedaya sapinipun Admetos nglairaken anak kembar nalika dipungembala déning Apollo [3][4].

Apollo ugi paring pambiyantu dhateng Admetos kanggé nikahi Alkestis, putri Pelias, raja Iolkus. Alketis dipunremeni déning kathah tiyang jaler saengga Peliasa damel tugas ingkang mustahil kangge para tiyang jaler ingkang tresna marang Alketis inggih menika kedah nitih kreta ingkang dipuntarik déning babi wana lan singa. Kanthi pambiyantu saking Apollo, Admetos kasil nglampahi lan ndadosaken Alketis garwanipun [5][6]

Nalika dinten pawiwahanipun, Admetos nampik paring sesembahan kagem Artemis saéngga sang dewi ngisi kamar pengantin kalihan ula. Apollo paring pambiyantu malih kanggé Admetos. Apollo ugi paring wewarah Admetoss kangge paring sesembahan kanggé Artemis supados dewi ngicalaken ula-ulanipun.

Pitulungan Apollo ingkang paling ageng dhateng Admetos menika nalika Apollo mbujuk para Dewi takdir supados munduraken sédanipun Admetos. Apollo damel para Dewi Takdir mabok dumugi sarujuk ananging kedah wonten tiyang ingkang purun nggantos sédanipun Admetos. Wiwitanipun tiyang sepuh Admetos ingkang purun séda nggantos Admetos ananging nalika dumugi dinten ingkang sampun katemtokaken tiyang sepuh kasebut boten purun séda. Lajeng Alketis garwanipun Admetos ingkang samekta séda kagem garwanipun [7].

Sasampunipun Alketis seda, Admetos nembé sadar bilih gesangipun wonten ing donya boten tentrem tanpa garwanipun lan gadhah kekajengan supados Alketis kondur gesang malih. Kala menika Herakles ingkang nembé nglampahi tugas nyekel Turangga Betina Diomedes, ngaso wonten ing dalemipun Admetos lan dipuntampi kanthi saé déning Admetos. Kangge paring piwales marang kabecikanipun Admetos, Herakles mlebet makam Alketis lajeng tarung kalihan Thanatos (dewa kematian). Herakles menang saéngga Thanatos purung ngonduraken roh Alketis dhateng donyanipun manungsa. Putranipun Admetos ingkang paling kondhang menika Eumelos ingkang mimpin pasukan Firae nalika Perang Troya. Kejawi menika Admetos ugi gadhah putri anama Perimele.

Cathetan suku[sunting | sunting sumber]

  1. ^ Robert Graves, The Greek Myths edisi revisi 1960 (index).
  2. ^ Karl Kerenyi, The Gods of the Greeks, 1951:138.
  3. ^ Callimachus, Ode to Apollo.
  4. ^ Bibliotheke,3.10.4.
  5. ^ Bibliotheke 1.9.15
  6. ^ Higinus, Fabulae, 50
  7. ^ Aiskhilos, Eumenides, 728.

Pranala Njawi[sunting | sunting sumber]

Sumber artikel punika saking kaca situs web: "http://jv.wikipedia.org/w/index.php?title=Admetos&oldid=876335"