Tangled

Saka Wikipédia Jawa, bauwarna mardika basa Jawa
Rapunzel sing dadi lakon ing filem Tangled

Tangled iku filem animasi 3D taun 2010 saka Amérika ajènre fantasi lan kemidhi sing digawé Walt Disney Animation Studios lan dibabar Walt Disney Pictures. Carita ing filem iki kurang luwih asalé saka carita Jerman "Rapunzel" ing klumpukan carita rakyat babarané Brothers Grimm. Filem iki dadi filem animasi unggulan angka 50 ing séri Walt Disney Animated Classics. Kanthi pangisi swara Mandy Moore lan Zachary Levi,[1] lakoné ngenani putri enom sing ilang tur duwé rambut sekti lan kapéngin banget minggat saka menara padunungané sing mergil. Nglanggar kekarepané mboké, dhèwèké sarana pitulung wong lanang bagus nuli minggat menyang sana sing durung tau diparani.

Sadurungé filem iki dibabar, sesirah filemé diganti saka Rapunzel dadi Tangled, saperlu minangkani sesirah sing nétral jèndher.[2] Tangled digawé salawas nem taun lan ngentèkaké $260 yuta sing, manawa bener, bakal dadi filem animasi paling akèh ngentèkakè dhuwit lan dadi filem paling larang kaping lima ing salawasé. Tangled nganggo gagrag artistik sing kusus sarana nyamboraké fitur-fitur citraan gawéan komputer lan animasi tradhisional sarta rèndher nirfotoréalistik saperlu nyipta imprési lukisan. Komposer Alan Menken, sing tau mèlu nggarap filem-filem animasi unggulan Disney sadurungé, mèlu manèh nggarap musik ing Tangled.

Tangled digebyagaké ing El Capitan Theatre kala 14 Novèmber 2010, nuli dibabar kanggo umum nalika 24 Novèmber 2010. Filem iki éntuk panampa apik saka para kritikus lan pamiarsa. Tangled kasil ngéntukaké pikolèhan $591 yuta minangka filem laris ing sakubenging donya,[3] sing $200 yutané asal saka Amérikah lan Kanadha. Filem iki dinominasi kanggo sawenèh kategori nugraha, kaya ta Lagu Asli Paling Apik ing Academy Awards angka 83. Film animasi iki dibabar Blu-ray lan DVD nalika 29 Maret 2011. Filem lanjutané, Tangled Ever After, dibabar ing taun 2012. Séri tivi filem iki bakal digebyagaké ing 2017.

Pratélan tetembungan[besut | besut sumber]

Ana ing ngisor iki tembung-tembung Jawa sing dianggo ing artikel iki, dikanthèni jarwané ing basa Indonésia lan Inggris.

  1. ajènre - bergenre - with genre
  2. dibabar - dirilis - to be released
  3. digebyagaké - ditayangkan perdana - to be premiered
  4. filem laris - filem laris - box office
  5. filem unggulan - filem utama - feature filem
  6. citraan gawéan komputer - computer-generated imagery
  7. jèndher - gender - gender
  8. kemidhi - komedi - comedy
  9. mergil - terpencil - secluded
  10. minangkani - menyesuaikan - to comply
  11. nyamboraké - mencampur-campurkan - to blend
  12. nugraha - penghargaan - award
  13. pamiarsa - penonton - audience
  14. panampa - penerimaan - reception
  15. pikolèhan - pendapatan - revenue
  16. rèndher nirfotoréalistik - non-photorealistic rendering
  17. séri - seri - series
  18. sesirah - judhul - title

Rujukan[besut | besut sumber]

  1. The Walt Disney Studios.
  2. Chmielewski, Dawn C.; Eller, Claudia (November 21, 2010). "Disney Animation is closing the book on fairy tales". Los Angeles Times. Dibukak ing November 23, 2010.
  3. "Tangled (2010)". Box Office Mojo. Dibukak ing May 25, 2011.