Star Trek: The Original Series

Saka Wikipédia Jawa, bauwarna mardika basa Jawa
(Kaelih saka Star Trek)

Star Trek utawa Star Trek: The Original Series iku sawijining acara télévisi Amérikah Sarékat kang kapisan ditayangaké antara taun 1966-1969 lan diripta déning Gene Roddenberry. Acara iki ngenani sains fiksi, critané prastawa-prastawa kang kadadéan sajeroning pesawat njaba akasa USS Enterprise (NCC-1701) marang para awak pesawaté nalika nglelana ing antariksa.

Acara iki kalaksanan ing galaksi Bimasakti, sakiwa-tengené dasawarsa 2260. Awak pesawat dibawahi Kaptèn James T. Kirk, Dhoktor Spock lan Dhokter Médis Leonard McCoy. Saben acara wiwit ana voice-over kang nyritakaké doné panglelanan pesawat:

Space: the final frontier. These are the voyages of the starship Enterprise. Its five-year mission: to explore strange new worlds, to seek out new life and new civilizations, to boldly go where no man has gone before.

Tegesé: "Antariksa, wates pungkasan. Iki prakara panglelana Kapal Lintang Enterprise. Maksud misiné kang suwéné limang taun: njlajah donya anyar lan anèh, nggolèk kauripan lan kabudayan anyar, lan kanthi kendel lunga menyang papan kang sadurungé durung tau diparani wong".

Acara séri TV iki diprodhuksi saka taun 1966-67 déning Desilu Productions, lan déning Paramaount saka 1968-69. Star Trek ditayangaké ing NBC saka tanggal 8 September 1966 nganti 3 Juni 1969. Sanadyan acara iki irah-irahan asliné Star Trek nanging ing tembé diarani dadi Star Trek: The Original Series (cekakané Star Trek: TOS utawa TOS) kanggo mbédakaké acara iki saka acara-acara turunané. Acara Star Trek dijabel sawisé telung mangsa lan 79 épisode déning NBC, amarga wijiné asor. Sanadyan mangkono, pangaribawané marang budaya populèr iku gedhé lan sérial iki dadi sérial cult klasik nalika tayangané diulang ing dasawarsa 1970-an. Sawisé iku acara iki dadi ndarbèni turunan lan kabangun saka sérial kartun, limang sérial TV tambahan, 12 filem biyoskup lan akèh buku, dolanan lan produk-produk liyané.

Konsèp[besut | besut sumber]

Ing abad kaping 23 umat manungsa ing Bumi wis bisa ngatasi masalah sosial lan ékonomi. Banjur manungsa wiwit njlajahi antariksa. Sawisé iku manungsa dadi nggawé pasekuton karo makluk-makluk njaba akasa. Awak Kapal Lintang U.S.S. Enterprise iku warna-warna rupané, ora namung manungsa waé nanging saka akèh anggota Sarékat Fédérasi Antar Planit. Kapal iki ditugasi kanggo nliti fénoména lan mungsuh-mungsuh kang durung tau diselidiki. Perkara iki dadi tantangan kusus Kaptèn James T. Kirk lan para prawirané .