Sadomiya

Sadomiya uga kalebu buta lelembut (bajobarat) balane Bathari Durga. Dedege padha karo Niramaya. Rambute ikal, mawa lar (swiwi), tutuke mrenges, mripate kiyipan (kelipan), irunge medhang (kaya pucuking pedhang, nyrongat munggah), kalunge kalung tanggalan sing ceploke rinengga inten, jarike motif kambil secukil. Dhangkane (papane buta) Sadomiya ing alas Setragandamayit.

Sadomiya pakaryane nggirigodha manungsa supaya dhemen laku zina. Ngojok-ojoki mudha mudhi sing lagi pacaran ing papan sepi supaya nindakake saresmi (hubungan suami istri). Ngojok-ojoki wong sing wis nduwe bojo supaya ndhemeni bojone tanggane, terus dibisiki atine supaya padha nindakake saresmi. Dibisiki nikmate wong saresmi, nganti wong lanang lan wadon mau kejegur ing samodra dosa.

Pancen wong wadon iku dititahake darbe lambe 2, sing loro-lorone mau mujudake sumber kanikmataning urip. Lambe nduwur nikmate kanggo memangan, dene lambe ngisor nikmate kanggo saresmi. Yen wong wadon bisa njaga peparinge Gusti warna 2 mau, bakal gedhe ganjarane ing akhirat. Nanging yen ora bisa njaga, aja ngarep-arep ambune swarga.

Supaya wong ora kena panggirigodhane Sadomiya, kudu temen-temen anggone nindakake piwulange agama suci. Mudha mudhi sing wis wancine omah-omah, yen wis nduwe pilihan calon bojo lan wis cekel gawe, kudu enggal-enggal diijabake utawa dirabekake. Tumrap wong sing wis nduwe bojo, kudu njaga pandengane (njaga mripate, aja ngumbar mata). Ana unen-unen Sukete tangga luwih subur, iku aja dituruti. Supaya tentrem uripe, kudu bisa ngendhaleni dhiri lan meper hawa nepsu.