Sabirun

Saka Wikipédia Jawa, bauwarna mardika basa Jawa

Sabirun yaiku seniman karawitan saka Yogyakarta lan anggota saka Pusat Latihan Tari (PLT) Bagong Kussudiardjo, Yogyakarta. Panjenengané melu dadi anggota PLT Bagong Kussudiardjo wiwit tanggal 2 Januari 1936.[1]

Kaluwarga[besut | besut sumber]

Kaluwargané Sabirun dudu seniman. Ananging simbah kakungé dadi abdi dalem ing Kraton Yogyakarta, yaiku dadi abdi dalem pengrawit. Abdi dalem pengrawit yaiku abdi dalem sing tugasé nabuh gamelan kraton. Amarga dadi abdi dalem Kraton Yogyakarta, simbah kakungé duwe gelar utawa paringan dalem (jeneng) yaiku "Sara Yuda". Saka simbah kakungé iku, Sabirun dadi seneng nabuh gamelan utawa sinau karawitan (seni nabuh gamelan).

Pagawean[besut | besut sumber]

Sadurungé dadi anggota PLT Bagong Kussudiardjo, panjenengané tau sinau jogèd lan dadi anggota saka organisasi jogèd klasik gaya Yogyakarta, yaiku Kridha Beksa Wirama sing dipimpin karo panjenengané D.P.H. Tédjokusumo lan B.P.H. Suryodiningrat. Saliyané, panjenengané uga dadi anggota saka organisasi Irama Citra sing dipimpin karo Suwargi Soedarso Pringgobroto. Panjenengané uga melu kegiatan karawitan neng grup teater Indonesia. Nèng grup kuwi ana Kusno Sudjarwadi, Kirdjomulyo, M. Nizar, Nasyah Djamin, lan sapituruté.

Sabirun uga sinau gendhing-gendhing kanggo ngiringi jogèd kréasi anyar, utamané ahli nèng kendhang. Sauwisé iku, Sabirun dadi anggota PLT Bagong Kussudiardjo. Karo Bagong Kussudiardjo, panjenengané dipercaya kanggo gawé iringan kanggo jogèd-jogèd, yaiku Jogèd Merak lan Jogèd Angsa. Bareng karo anggota liyané, panjenengané mèlu ndukung pagelaran gamelan Gendhing sing diciptakaké karo K.R.T. Wasitodipuro.

Saliyané iku, Sabirun uga dadi anggota saka Misi Kesenian Indonésia nèng pirang-pirang negara, yaiku:

  1. Taun 1962 nèng Bangkok, India, lan Ruslan.
  2. Taun 1964 nèng RRC lan Philipina.
  3. Taun 1967 tampil nèng pagelaran Festival Ramayana Internasional nèng Pandaan, Jawa Timur.
  4. Mèlu Misi Kesenian sing diselenggarakaké Kodim VII (saiki Kodam IV) Diponegara.

Sabanjuré Sabirun dikongkon dadi guru karawitan nèng SMKI Yogyakarta. Amarga panjenengané sregep nèng bidang seni karawitan, panjenengané nampa partisara (piagam) saka Kodam VII Diponegara, saka Perkini, saka PT. BP. Kedaulatan Rakyat, lan penghargaan (partisara) karawitan saka Festival Sendratari Yogyakarta (FSY).

Referensi[besut | besut sumber]

  1. Dwiyanto, Djoko. Revianto Budi Santosa (2010). Ensiklopedi Yogyakarta. Yogyakarta: Dinas Kebudayaan Provinsi Daerah Istimewa Yogyakarta.