Ngerik

Ngerik inggih punika salah satunggaling reroncen upacara mantenan. Upacara ngerik dipunadani sabibaripun upacara siraman. Upacara punika ngenot pamrih supados calon temanten nyata-nyata resik lair lan batosipun. Tembung ngerik ngemot teges nyukur wulu kalong utawi sinom, inggih punika rikma ing bathuk sisih nginggil. Sarana makaten mengku pamrih supados katon resik lan praupanipun katingal sumunar (mawi cahya). Upacara ngerik punika katindakaken ddening calon temanten putri. Déné calon temanten kakung boten perlu nindakaken upacara punika. Saderengipun ngerik, juru paes kedah ngucapaken donga, ing antawisipun kados makaten: "niyat ingsun arep ngerik, muga-muga tinebihna saka rubeda".
Kajawi ngerik kanggé ngilangi wulu kalong lan sinom, ngerik ugi ngemot suraos kanggé ngilangi watak mbocahi. Sajeroning nindakaken pangerikan punika juru paes maringi pitutur ingkang gadhah paedah ugi saged migunani tumrap calon manten, sajeroning tata-tata siyaga dhiri kanggé ngenjing ngadhepi gesang bebrayan, minangka jejeripun laki lan rabi, punapa déné minangka bapa lan biyungipun putra-putra ing tembenipun. Limrahipun pitutur ingkang dipunparingaken dhumateng calon temanten putri inggih punika paring pangertosan bab ngladosi garwa, setya marang garwa. Ugi boten katalompen utawi kesupen pitutur bab tindak-tanduk kaping pisan ngadhepi malem penganten. Wosipun, nalika punika calon temanten putri kedah siyaga lair lan batosipun mengku bale omah siyaga ngadhepi bebrayan.