Kebo Marcuet

Kebo Marcuet iku wujud manungsa sirah kebo, tutuke amba, sungune lancip, lan dedege ngluwihi wong lumrah. Tokoh iki mung tinemu ing wayang krucil, lakon Kebo Marcuet.

Jumbuh klawan wujude sing aneh, Kebo Marcuet mangane gragas (memangan barang sing ora patut dipangan). Apa-apa dipangan. Iwak mentah, ula, kodhok, kadhal, tikus, wohwohan dipangan. Kajaba iku, dheweke mentala mateni wong, yen panjaluke ora dituruti.

Kebo Marcuet digdaya sekti mandraguna. Awake ora tedhas ditamani landheping gegaman wujud apa wae. Karosane ngedab-edabi (nggumunake). Yen ngayuda tanpa migunakake gegaman. Gaman pamungkase wujud sungu. Sing sapa kena sundhang (ketaman sungune), mesthi tumekaning pati.

Jumedhule Kebo Marcuet

Sapa wongtuwane Kebo Marcuet, ora dicritakake. Sing cetha, metu saka alas, tumuju pasar desa wewengkon Majapait, saprelu nggolek pangan. Tekane Kebo Marcuet nggawe gegere wong sakpasar. Wong-wong padha mlayu keweden.

Wong-wong kang padha keplayu iku, dumadakan kepethuk Patih Maudara, patih ing kraton Majapait. Atur uninga yen pasar katekan makhluk gegilani, makhluk salah kedaden. Manungsa endhas kebo, sungune mingis-mingis. Jarah-rayah wujud pangan. Sing sapa mepalangi, dipateni.

Kebo Marcuet dadi jagoning Majapait

Tumraping Patih Maudara, kang kadhawuhan dening Prabu Brawijaya supaya golek jago, kanggo nyirep kramane Adipati Bandar Subali ing Grathi, dianggep kabeneran. Mula Kebo Marcuet banjur ditemoni. Bakal dialap gawene.

"Yen kowe butuh urip kepenak, mangan enak, bakal keturutan. Mengko bakal daksuwunake pangkat lan kalungguhan ing Majapait. Mung wae wektu iki Majapait lagi ketaman reribet, awit mrengkange utawa balelane adipati ing Grathi. Yen kowe bisa ngrangket, gedhene bisa mateni Adipati Bandar Subali ing Grathi, bakal gedhe ganjarane," ngendikane Patih Maudara.

"Ya, daksaguhi. Adipati Grathi Bandar Subali dakpatenane. Aku ning Grathi ora prelu gawa bala. Cukup aku dhewe," ucape Kebo Marcuet.

Tekan Kadipaten Grathi, Kebo Marcuet nggawe geger. Kabeh prajurit Grathi ora ana sing bisa ngalahahake. Sang Adipati banjur nandhingi. Wasana Adipati Bandar Subali gugur.

Kebo Marcuet ngukuhi Grathi

Nalika arep disowanake ing Majapait, Kebo Marcuet nulak, "Nek aku gelem, penak kowe. Grathi wis dadi panguwasaku. Aku arep jumeneng adipati ing Grathi. Ora sudi dheku-dheku ing Majapait."

"Mengko ndhisik to Marcuet. Kowe kuwi dutaning ratu. Saiki kowe wis bisa entuk gawe, mula wajibe kudu sowan ing ngarsane ratu kang utusan. Mengko kowe bakal entuk ganjaran gedhe."

"Aku ora bakal suwita ratu Majapait. Grathi dadi kadipaten perdikan sing ora kebawah ngendi wae," ucape Kebo Marcuet karo nglungani.

Pirsani Uga

Kapethik Saking

Mulyantara, seseratan tokoh wayang wonten samak majalah Jaka Lodhang (laman blog seseratan)