Gréja Gökhem

Gréja Gökhem

Gréja Gökhem (Swèdhen Gökhems kyrka) iku sawijining gréja Lutheran sing dibangun mawa gagrag Romanesque. Dunungé 12 km sakuloné Falköping ing Kabupatèn Västra Götaland, Swèdhen. Gréja iki kalebu kabiskopan Skara. Gréja iki salah sijiné gréja watu sing lawas dhéwé ing Swèdhèn. Lukisan témboké sing saka abad kaping 15 uga kawentar, katoné iki karyané Master Amund.

Sujarah lan arsitèktur

Gréja Gökhem iku salah sawijining gréja tuwa dhéwé ing Swèdhen. Sawisé upengan uwit dianalisis umuré (déndrokronologi), wong bisa weruh menawa gréja dibangun taun 1077. Olèhé mbangun nganggo watu wedhi lan gamping, asliné kabangun saka apsis bundher, panti iman lan panti umat sing luwih amba. Ana kapèl lan sakristi ing tembé ditambahaké saloring panti imam. Senadyan akèh cendhéla iku digedhèkaké, cendhéla ing sisih lor panti imam ora diowahi wiwit abad Tengahan. Kawursita menara loncèng dibangun déning para narapidana Ruslan ing dasawarsa 1720-an.

Interior

Plafon kubahé, sing nggantèni plafon kayu sadurungé, dibangun ing udakara tahun 1485. Nganti taun 1720, tau ana layar salib kamenangan lan altar abad tengahan. Banjur ana lukisané Santa Maria sing dilih menyang kapèl. Mimbar gréja saka abad kaping 18 iku diwèhi rerengga lukisan para nabi lan murid Yésus, kamangka orgelé ndarbèni lukisan modhèren para rasul. Patung-patung inukir sangisoré mimbar iku saka abad kaping 17. Gréja iki ndarbèni bak baptis loro, saka abad kaping 12, salah sijiné saka Gréja Överkyrke sing saiki kari puing waé.

Lukisan témbok

Témbok lan plafon gréja diwèhi rerengga lukisan témbok ing abad kaping 15 mawa warna coklat, ijo, lan biru-klawu. Lukisan ing plafon kubah ora tau katutup dilabur lan mulané apik kalestarèkaké nganti sepréné. Lukisan ing témbok, sing wis dirèstorasi, kahanané luwih ala. Iku sing ana ing apsis lan panti imam uga ngalami karusakan saka cèt biru, sing dienggo nutup ing abad kaping 19.

Olèhé lukisan ing kéné mèmper karo sing ana ing Gréja Södra Råda, nandhakaké menawa kabèh iku bisa waé sing nglukis padha: Master Amund. Panti imamé ndarbèni lukisan perkara Tritunggal, Para Bapa Gréja, lan nabi-nabi. Plafon kubah tengah nuduhaké adegan Panyiptan, kamangkan ing bagéan kuloné ana gambar-gambar dosa pokok lan pitung kabecikan. Santa Maria lan rosarioné bisa dideleng ing témbok lor. Legèndha Katarina saka Iskandariyah dadi rerengganing portik.

Gladri

Jaba

• 
  Gréja mawa menara loncèng gumantung
• 
  Saka jaba ing sisih lor
• 
  Papan kur karo apsis ing sisih kidul
• 
  Apsis
• 
  Cendhéla apsis

Jero

• 
  Interior sing ngadhep altar
• 
  Rerengganing altar
• 
  Dhitèl lukisan témbok
• 
  Dhitèl lukisan témbok
• 
  Gladri orgel

Kapustakan

• Hernfjäll, Viola (1987). Gökhems kyrka (ing basa Swedia). Skara stifts kyrkobeskrivningskomm. ISBN 978-91-86258-05-4.

Pranala njaba

• Médhia magepokan Gréja Gökhem ing Wikimedia Commons