Giotto di Bondone

Saka Wikipédia Jawa, bauwarna bébas abasa Jawa
Kamungkinan gegambaran Giotto saka Kapèl Peruzzi (kasil rèstorasi dhigital)

Giotto di Bondone (udakara 1267–8 Januari 1337), sing lumrahé diapali minangka Giotto iku sawijining pelukis saka Italia lan arsitek saka Firenze . Dhèwèké dianggep sing paling pratama ing barisan para seniman gedhé ing Renaisans Italia.

Giovanni Villani, sing urip ana ing wektu bebarengan karo Giotto, nyerat yèn dhèwèké iku rajané para pelukis, sing bisa nggambaraké citra-citra kaya-kaya citra-citra kuwi urip. Villani mratèlaké, amarga dhèwèké banget pinteré, kutha Firenze wènèh bayaran marang dhèwèké.[1]

Ing abad angka 16, biografer Giorgio Vasari mratèlaké yèn Giotto ngalihaké lukisan saka gagrag Bizantium sing lumrah digawé karo seniman liyané ing jamané dhèwèké, lan nguripaké seni lukisan sing agung kaya sing sabanjuré digawé karo para pelukis Renaisans kaya ta Leonardo da Vinci. Giotto bisa kaya mangkono amarga dhèwèké nggambar citra-citrané saka kauripan sunyata, lan ora njaplak saka gambar-gambar kuna sing uwis misuwur kaya sing ditindakaké seniman Bizantium kaya ta Cimabue lan Duccio.[2]

Karyané Giotto sing paling agung ya iku dékorasiné Scrovegni Chapel ing Padua, sing dirampungake watara taun 1305. Yasané lumrahé diarani "Kapel Arena" amarga iku dumunung ana ing panggonané arena Roman Kuna. Séri lukisan fresko iki nyritakaké bab uripé Maria lan uripé Yesus. Lukisan kuwi dianggep salah sawijining mahakarya saka Renaisans kawitan.[3]

Sanajan Vasari nyerat bab uripé Giotto, ora tau ana sing ngerti pira cacahé saka carita-carita kuwi sing bener kaya kasunyatané, amarga Vasari nyerat kuwi punjul 200 taun sawisé Giotto tinggal donya. Amung ana rong perkara sing diyakini bener. Ing taun 1334, Giotto dipilih déning rad commune Firenze saperlu nggawé pola rancangan menara loncèng ana sacedhaké Katedral Firenze sing rikala kuwi lagi diyasa. Giotto uga sing nglukis "Kapel Arena", nanging ora ana sing ngerti ana ing endi dhèwèké lair, sapa sing tau dadi guruné, kaya ngapa praupané, apa bener dhèwèké sing nglukis lukisan Fresko sing misuwur ana ing Asisi, utawa ana ing endi dhèwèké dikubur.

Rujukan[besut | besut sumber]

  • G.Previtali, Giotto e la sua bottega (1993)
  • Giorgio Vasari, Le vite de più eccellenti pittori, scultori e architetti (1568)
  • Giorgio Vasari, Lives of the Artists, trans. George Bull, Penguin Classics, (1965) ISBN 0-14-044164-6
  • Sarel Eimerl, The World of Giotto, Time-Life Books, (1967), ISBN 0-900658-15-0

Cathetan suku[besut | besut sumber]

  1. ^ Bartlett, Kenneth R. (1992). The Civilization of the Italian Renaissance. Toronto: D.C. Heath and Company. ISBN 0-669-20900-7 (Paperback). Page 37.
  2. ^ Giorgio Vasari, Lives of the Artists, trans. George Bull, Penguin Classics, (1965)
  3. ^ Hartt, Frederick (1989). Art: a history of painting, sculpture, architecture. Harry N. Abrams. kk. 503–506.