Takhta Suci

Saka Wikipédia, Bauwarna Mardika abasa Jawa / Saking Wikipédia, Bauwarna Mardika abasa Jawi
Langsung menyang: pandhu arah, pados

Tahta Suci (Basa Latin: Sancta Sedes) punika tahta keuskupan Roma. Pejabat lan petinggi lokal saking Keuskupan Roma inggih punika Uskup Roma, ingkang langkung dipuntepangi kanthi sebatan Sri Paus. Istilah Tahta Suci, kadosdéné ingkang dipunpigunakaken salebetipun ukum kanonik, ugi dipunpahami minangka Sri Paus lan Kuria Romawi (Basa Latin: Curia Romana, sacara harafiah tegesipun “Dhéwan Romawi”), inggih punika pusat pamaréntahan Gréja Katulik, lan arupi pangertosan ingkang umum dipunpigunakaken sapuniki.

Tahta Suci ugi dipunsebat "Tahta Apostolik", senadyan nami puniki dipunpigunakaken kagem tahta keuskupan pundi kémawon ingkang dipundegaken déning para Rasul Kristus lan sacara khusus kagem tiga tahta patriarkat purba, inggih punika Roma (Santo Petrus lan Santo Paulus), Alexandria (Santo Markus) lan Antiokhia (Santo Petrus). Ing tembé wingking Konstantinopel lan Yerusalem ugi dipunlebetaken salebetipun golongan tahta patriarkat. Gangsal tahta puniki dipunurutaken adhedhasar tingkat kinurmatan inggih punika Roma, Konstantinopel, Alexandria, Antiokhia, Yerusalem.

Sasanèsipun Roma, Tahta Keuskupan Agung Mainz, ingkang ugi arupi jenjang elektoral lan primasi, punika satunggil-satunggilipun tahta keuskupan sanès ingkang ugi dipunsebut kanthi nami "Tahta Suci" senadyan sebatan wau arang sanget dipunpigunakaken.

Organisasi Tahta Suci[sunting | sunting sumber]

Paus ngurus Gréja liwat Kuria Romawi. Kuria Romawi kapérang saking Sekretariat Nagari, 9 Kongregasi, 3 Tribunal, 11 Dhéwan Kepausan, lan sarangkaian jawatan ingkang ngladosi urusan Gréja ing tingkat paling inggil. Sekretariat Nagari, dipuncipeng déning Kardinal Sekretaris Nagari, ngarahaken lan ngoordhinasi Kuria. Jabatan Sekretaris Nagari, ingkang sapuniki dipuncipeng déning Tarcisio Kardinal Bertone, arupi padanan Tahta Suci kanggé jabatan Perdhana Mentri. Uskup Agung Dominique Mamberti, Sekretaris bagéyan Hubungan kaliyan Nagari-Nagari saking Sekretariat Negara tumindak minangka Mentri Manca Nagari Tahta Suci. Bertone lan Mamberti nampi panugasanipun piyambak-piyambak saking Sri Paus Benediktus XVI nalika wulan September 2006.

Institusi-institusi ageng saking Kuria Romawi ingkang paling aktif ing antawisipun inggih punika Kongregasi Doktrin Iman, ingkang mantau doktrin Gréja; Kongregasi para Uskup, ingkang ngoordhinasi pangangkatan uskup ing saindhenging donya; Kongregasi Panginjilan Bangsa-Bangsa, ingkang mantau sedaa aktivitas misi; lan Dhéwan Kepausan kagem Kaadilan lan Katentreman, ingkang gegandhèngan langsung kaliyan isu-isu sosial lan katentreman internasional.

Katiga badan Tribunal kagungan tenggel waler dhumateng wewenang yudikatif. “Sacra Rota” kagungan tanggel waler dhumateng pangajuan perkawis-perkawis biasa, kalebet keputusan pambatalan palakrami. “Apostolica Signatura” tumindak minangka dhéwan administratif pangajuan perkawis lan mahkamah agung gréjawi. “Apostolica Penitentiaria” kagungan tanggel waler dhumateng dipunwedalaken absolusi, dispensasi, lan indulgensi.

Prefektur Perekonomian ngoordhinasi kauangan dhépartemèn-dhépartemèn Tahta Suci lan nyelia administrasi “Patrimoni Tahta Suci”, satunggiling dana investasi ingkang awalipun saking Prajanjian Lateran. Satunggiling komisi ingkang anggotanipun 15 Kardinal, dipunketuai Kardinal Sekretaris Nagari, nyipeng wewenang pangawasan final dhumateng sedaya urusan kauangan Tahta Suci, kalebet urusan-urusan Institut Karya Réligius, inggih punika Bank Vatikan. Prefektur Rumah Tangga Kepausan kagungan tenggel waler dhumateng upacara-upacara kepausan sarta pakaryan lan kagesangan sedinten-dinten saking Sri Paus.

Sami kadosdéné Tahta-Tahta Apostolik sanèsipun, Tahta Suci mboten bibar menawi Sri Paus tilar donya utawi ngunduraken dhiri. Kosok wangsulipun Tahta Suci lumampah kaliyan satunggiling pakèt hukum sede vacante ingkang bènten. Salami mangsa interregnum kasebat, para pejabat Kuria Romawi (kadosdéné para prefèk kongregasi) tumut mandheg njabat, kejawi kalih pejabat inggih punika Kepala Penitentiaria, ingkang nglajengaken perananipun ingkang wigatos salebetipun perkawis pamaringan absolusi lan dispensasi, sarta Kardinal Camerlengo (Kepala Urusan Rumah Tangga Kepausan), ingkang nglampahaken urusan-urusan sauntawis (inggih punika properti lan kauangan) Tahta Suci salaminipun periode puniki. Kapamimpinan Tahta Suci, ingkang ugi arupi kapemimpinan Gréja Katulik, dipunbebanaken dhumateng Dhéwan Kardinal. Hukum Kanonik nglarang Dhéwan Kardinal lan Camerlengo nepangaken inovasi utawi perkawis énggal punapa kémawon salebetipun pamaréntahan Gréja salaminipun periode puniki.

Sumber artikel punika saking kaca situs web: "http://jv.wikipedia.org/w/index.php?title=Takhta_Suci&oldid=827587"