Anggang-anggang

Saka Wikipédia, Bauwarna Mardika abasa Jawa / Saking Wikipédia, Bauwarna Mardika abasa Jawi
Langsung menyang: pandhu arah, pados
Anggang-anggang (Gerridae)
Anggang-anggang Gerris remigis
Klasifikasi èlmiah
krajan: Animalia
filum: Arthropoda
kelas: Insecta
ordo: Hemiptera
Suborder: Heteroptera
Infraorder: Hemiptera
kulawarga: Gerridae
Leach, 1815
Genera

Aquarius
Eotrechus
Gerris
Halobates
Limnogonus
Limnoporus
Metrobates
Neogerris
Rheumatobates
Trepobates

Anggang-anggang yaiku jinisé kéwan srangga kang uripé ana banyu.[1] Ing basa Inggrisé kasebut water strider, saliyané iku uga ana kang ngarani jesus bug.[1] Anggang-anggang utawa iwak sewu iki bisa didadèkake pratandha alami yèn banyu iki ora kena limbah.[2]

Anggang-anggang arupa saklompok srangga pamangsa sing kabèh klebu jroning suku Gerridae. Anggotané, watara 340 jinis, akèh sing angèl dibédakaké. Jroning literatur ditepungi uga sacara salah kaprah minangka "angga-angga banyu", senajan srangga iki pancèn dudu angga-angga. Jeneng "anggang-anggang" dhéwé asalé saka obahé sing maju-mundur sambi ngambang.[3]

Srangga iki gampang banget ditepungi amarga kabiyasaan uripé sing mesthi mlaku/mlumpat ing lumahing banyu. Obahé cepet, bisa nganti 1.5 m/s. Akèh-akèhé urip ing banyon anteng, nanging ana limang jinis (saka marga Halobates) sing dikawruhi urip ing lumahing samodra.[4] Saka lumahing banyu, anggang-anggang ngincer mangsa (biyasané srangga liya) sing ana ing cerak lumahing banyu.

Kéwan iki dadi modhèl jroning panlitèn biofisika ngenani kamampuan tekanan permukaan jroning nyangga beban. Ana rong aspèk sing dadi kawigatèn: kamampuan ngambang ing lumahing banyu lan kamampuané obah maju kanthi cepet.

Kamampuan ngambang asalé saka anané rambut-rambut cilik banget (microsetae) kasusun kanthi arah tinentu mawa lekukan-lekukan jroning ukuran nanometer ing pucuk sikilé lan dijangkepi karo lapisan malam (lilin), nanging èfèk hidrofobik luwih disebabaké déning struktur fisik sikil tinimbang lapisan malam sing ana. [5] Dikawruhi uga, ana pojok kontak èfèktif sikil karo banyu gedhéné 167.6° ± 4.4°. Amarga rapeté rambut-rambut cilik sarta lekukan-lekukan sing ana, udhara kacandhet ing struktur iku lan duwé fungsi minangka "bantalan" ing lumahing banyu.

Kamampuan obah kanthi cepet uga narik kawigatèn èlmuwan. Kanggo obah, anggang-anggang ngenet lumahing banyu mawa pasangan sikil tengahé tanpa nembus lumahing banyu, mbentuk cekungan ing lumahing banyu. Cekungan iki cukup jero kanggo nyurung awak srangga maju. Saliyané iku, sapérangan indhividu bisa migunakaké sewiwi sing sok-sok diduwèni srangga iki. Jroning kahanan urip kurang nguntungaké, anggang-anggang akèh-akèhé ora duwé sewiwi. [6]

Cathetan sikil[sunting | sunting sumber]

  1. ^ a b (id) [1] Kaundhuh tanggal 14 Juli 2011
  2. ^ (id) [2] Kaundhuh tanggal 20 Juli 2011
  3. ^ Wojowasito, S. 1977. Kamus Kawi-Bahasa Indonesia.
  4. ^ ESA Paper: Molecular genetics and distribution of the ocean-skater Halobates (Heteroptera: Gerridae)
  5. ^ Gao X, Jiang L. 2004. Biophysics: water-repellent legs of water striders. Nature 432:36. doi=10.1038/432036a
  6. ^ Discoverlife


Pranala njaba[sunting | sunting sumber]

Commons-logo.svg
Wikimedia Commons gadhah galeri bab:
Sumber artikel punika saking kaca situs web: "http://jv.wikipedia.org/w/index.php?title=Anggang-anggang&oldid=830779"