Wuwuh

Embung Nglanggeran Mengeti Warsa Enggal

Pengetan warsa enggal wonten ing Dewa Wisata Nglanggeran, inggih menika pahargyan kangge mengeti duginipun warsa enggal ingkang dipunadani dening masyarakat Desa Wisata Nglangeran.Duginipun warsa enggal wonten ing saben taunipun mesthi dipunlampahi wonten ing pundi-pundi papan. Boten namung wonten ing kitha, nanging ugi wonten ing desa-desa, boten namung wonten ing taman hiburan, ananging ugi dipunadani wonten ing papan-papan pariwisata. Makaten ugi wonten ing Desa Wisata Nglanggeran ingkang mapan wonten ing Desa Nglanggeran, Kecamatan Patuk, Kabupaten Gunungkidul, Yogyakarta. Desa Wisata Nglanggeran menika ngawontenaken maneka kagiyatan kangge mahargyani mlebetipun warsa enggal dhateng taun 2019. Adicara ingkang dipunadani menika maneka warna. Adicara kangge mahargyani duginipun warsa enggal menika dipundamel kanthi serangkaian adicara ingkang dipunadani wiwit tanggal 29 Desember 2018 dumugi tanggal 01 Januari 2019. Serangkaian adicara kalawau karantam kanthi sae saha kalaksanan kanthi regeng. Sadaya rangkaian adicara kalawau dipunleksanani wonten ing Panggung Amfliteater ingkang mapan wonten ing objek wisata Embung Nglanggeran. Kangge mirsani adicara-adicara kalawau kedah mbayar sedasa ewu kangge mlebet wonten ing objek wisata Embung Nglanggeranipun. Adicara menika kawiwitan mawi pagelaran kesenian lokal, inggih menika kesenian tayub jtawi warga masyarakat sekitar Nglanggeran menika asring nyebut mawi kesenian ledhek ingkang dipunminangkani dening kelompok Tayub Sekar Arum saking tlatah Nglanggeran ugi. Adicara menika dipunadani rikala tanggal 29 Desember 2018 siyang, udakara tabuh 13.00-16.00 WIB. Adicara salajengipun dipunleksanani rikala tanggal 31 Desember 2018 tabuh 20.00 WIB dumugi tabuh 00.00 WIB ingkang kalajengaken pesta kembang api wonten ing sekitaripun embung. Adicaranipun inggih menika wonten Orkes Melayu ingkang ngundang bintang tamu saking kelompok orkes melayu Naza Putra. Adicara wonten ing ndalu menika dipuntonton dhateng atusan tiyang, ngantos panggenan kangge parkir kendharaan menika boten amot. Kalih adicara kalawau kalampahan kanthi wekdal ingkang beda saha dipunselani, tanggal 30 menika boten wonten adicara. Miturut Mas Krismantoro (21), minangka panitia penyelenggara ingkang tumut nyengkuyung pahargyan warsa enggal wonten ing Nglanggeran menika ngandharaken bilih tanggal 30 Desember 2018 menika boten dipunwonteni kaguyatan amargi kangge nyamektakaken adicara tanggal 31-ipun. Amargi kathah ingkang dipunsamektakaken kalebet panggung hiburan, alat musik, saha kembang api ingkang kedah dipunsamektakaken saksae-saenipun, saengga tanggal 30 menika boten dipunwonteni kagiyatan. Wonten ing saben taunipun Desa Wisata Nglanggeran tansah ngadani pahargyan kangge mengeto warsa enggal kanthi kesenian-kesenian, sae tradhisional ugi modern. Adicara menika saben taunipun tansah dipunantu-antu dening masyarakat ingkang badhe mahargya warsa enggal wonten ing Desa Wisata Nglanggeran, mliginipun wonten ing kawasan objek wisata Embung Nglanggeran.