Wadhuk Lalung
Wadhuk Lalung inggih menika salah satunggaling papan wisata ingkang mapan wonten ing Margi Lalung-Bekonang, Kelurahan Lalung, Kecamatan Karanganyar, Kabupatèn Karanganyar, Jawa Tengah. Wadhuk menika dunung wonten ing patigan panggihing Margi Slamet Riyadi saha Margi Lalung-Bekonang, wonten ing sisih lèr-kilèn saking patigan kasebut.[1]
Samenika Wadhuk Lalung katindakaken déning BKSDA Bengawan Solo. Rumiyinipun padunungan menika arupa padhusunan alit, ananging dipunlelepaken amargi badhé dipundamel dados wadhuk. Para warga ingkang dunung wonten ing ngriku lajeng dipunpindhah dhateng papan ingkang sampun dipuncumawisaken.[2]
Sujarah
[besut | besut sumber]Miturut sujarahipun, Wadhuk Lalung kawangun déning Pamaréntah Indhiya Nèderlan wonten ing taun 1940 saha karampungaken wonten ing taun 1942 sesarengan kaliyan palenggahanipun Jepang wonten ing tlatah menika. Ingkang nglampahaken wewangunaning wadhuk inggih menika masarakat sakubengipun utawi tiyang Walandi mastani minangka inlander (tiyang pribumi).[1]
Dhasar kawangunipun wadhuk kasebut inggih menika kangge irigasi sabin supados logistik uwos kanggé tetiyang ingkang wonten ing andhapipun Indhiya Nèderlan boten kekirangan uwos. Sadèrèngipun, padunungan wadhuk menika dipun-ginakaken kanggé padhusunan ingkang kaubeng kaliyan sabin-sabin ingkang wiyar.[1]
Wadhuk awiyar 7.394 héktar saha volume 5 yuta mèter kubik menika sumber toyanipun saking Lèpèn Jetis. Wadhuk menika asring dipun-rénovasi amargi nalika wiwitanipun dipunwangun taksih samadya. Dèrèng karampungan anggènipun mangun wadhuk, tlatah menika sampun dipunkuwasani déning pasukan Jepang saéngga Pamaréntah Indhiya Nèderlan boten saged nglajengaken wewangunan menika.[1]
Sasampunipun Indhonésia mardika, réhabilitasi kanggé wadhuk menika kalampahan malih kanthi ngiyataken tanggul-tanggul sakubenging wadhuk kasebut supados boten jebol. Samenika tanggul kasebut saged kaambah kaliyan pit motor wonteng ing inggilipun.[1]
Papan wisata
[besut | besut sumber]Wadhuk Lalung kondhang kaliyan swasana kaéndahaning alam. Wisatawan saged ningali plethèking saha suruping surya saking pinggiring tanggul wonten wadhuk. Nalika énjing, wisatawan saged ningali pasawangan plethèking surya sinambi katingal Redi Lawu ingkang madeg wonten ing sisih wetan. Wondénipun menawi ningali suruping surya, wisatawan ugi saged ningali pasawangan sinambi ningali Redi Merapi saha Merbabu ingkang madeg sajajar wonten ing sisih kilèn.[3]
Warga sakubenging wadhuk limrahipun ngginakaken wadhuk minangka sarana misaya ulam. Para wisatawan ugi saged misaya ulam wonten ing wadhuk menika kanthi lelahanan. Wonten ing wadhuk ugi dipun-ginakaken kanggé papan olahraga jogging nalika ing énjing utawi sonten. Margi sakubengipun Wadhuk Lalung ingkang sampun dipun-paving paosipun 4 kilomèter limrah dipun-ginakaken dados jogging track. Wadhuk Lalung ugi saged dipun-ginakaken dados papan anggegulang SAR amargi toyanipun ingkang wonten ing wadhuk boten wonten ombakipun.[3][4][5][6]
Wadhuk Lalung samenika ugi dipun-ginakaken kanggé papan lampah dagang. Kathah tiyang ingkang bebakulan jajanan ugi unjukan. Para warga ugi saged pamedal arupa yatra ingkang sampun gumathok kanggé béaya parkir. Nalika toyanipun wadhuk asat wonten ing mangsa katiga, wisatawan saged ningali tilasing uwit ageng wonten ing dhasaring wadhuk. Miturut para pandameling wadhuk, uwit menika boten saged dipunpindhah amargi ageng sanget. Wadhuk ingkang asat ugi asring dipun-ginakaken dados papan nanem palawija.[3][5]
Rujukan
[besut | besut sumber]- ↑ a b c d e Nugroho, Adi (2023-04-21). "Pesona Keindahan Destinasi Wisata Waduk lalung di Lalung KarangAnyar Solo Jawa Tengah". Tempat.org (ing basa Inggris Amérika Sarékat). Diarsip saka sing asli ing 2023-06-04. Dibukak ing 2023-10-10.
- ↑ Borobudur, Badan Otorita (2023-04-10). "Waduk Lalung Karanganyar". Badan Otorita Borobudur (ing basa Indonesia). Dibukak ing 2023-10-10.
- ↑ a b c "Pesona Waduk Lalung Karanganyar". Matra Pendidikan (ing basa Indonesia). Diarsip saka sing asli ing 2023-12-04. Dibukak ing 2023-10-10.
- ↑ "Waduk Lalung Sediakan fasilitas Gratis Bagi Mancing Mania". https://poltekkesbhaktimulia.ac.id (ing basa Indonesia). 2014-06-12. Dibukak ing 2023-10-10.
{{cite web}}: External link in|website= - ↑ a b "Waduk Lalung, Karanganyar | CV. ixoTransport". www.ixotransport.com. Diarsip saka sing asli ing 2016-10-29. Dibukak ing 2023-10-10.
- ↑ "Waduk lalung Karanganyar, Tempat Sejarah Zaman Belanda" (ing basa Inggris). Dibukak ing 2023-10-10.