Unggah-ungguh mertamu

Unggah-ungguh mertamu ya iku solah bawa utawa tumindak nalika mertamu. Mertamu ya iku salah sawijiné fungsi sosial ana ing masarakat lan wis lumrah kanggoné kabèh uwong. Ananging uwong ora bisa mertamu ana ing ngomahé wong liya tanpa unggah-ungguh, arepa kuwi mertamu ana ing ngomahé kanca sing wis rumaket. Ana manéka warna babagan kang kudu digatèkake nalika mertamu ana ing ngomahé wong liya.

Urut-urutané mertamu

1. Ngabari dhisik marang wong kang arep dituju. Menawa arep mertamu amrih apiké kudu ngabari dhisik, léwat télpon utawa ana janji kanthi omong langsung. Kanggoné wong sing arep ditekani, iki dadi kabar, lan dhèwèké bakal ngrasa yèn diajèni. Yèn ora wènèhi kabar dhisik, bisa waé nalika sing mertamu teka, kang duwé omah bisa waé lagi ana acara liya utawa ora gelem diganggu karo dhayoh. Kanggoné dhayoh, mesthi duwèni kapesthèn, apa sing duwé omah ana ing ngomah lan siyaga yèn arep ditekani dhayoh.
2. Cocok wektuné. Yèn dhayoh wis janji arep teka ana ing jam seméné, anggoné teka kudu trep karo wektu kang wis dijanjikaké. Iki bakal mènèhi tumindak sing apik kanggo wong sing arep ditekani. Kejaba kuwi kanggo nggampangaké sing duwé omah anggoné ngatur wektu. Bisa waé sing duwé omah lagi ana acara kang akèh, saéngga nalika nyetujoni wong kang arep mara dhayoh ana ing wektu kuwi, bisa waé amung kuwi wektu kang bisa kanggo nemoni wong kang arep mara dhayoh.
3. Lumebu ngomah yèn wis dikon. Yèn mertamu durung ana wong sing duwé omah, mula kudu sabar nganti ana sing bukakaké lawang. Arepa lawangé ora dikunci, ananging aja nglancangi lumebu, thothok-thothok dhisik, lan lumebu yèn wis dikon.
4. Uluk salam. Nalika ketemu wong sing duwé omah, kudu uluk salam. Kanggo pakurmatan sing duwé omah, lan kanggo tandha yèn dhayoh wis teka. Nalika dhayoh arep pamitan, uga uluk salam.
5. Éling wektu. Cerak kaya ngapa waé dhayoh karo sing duwé omah, jenengé dhayoh ya kudu éling wektu.
6. Jaga unggah-ungguh basa. Tumindak sopan anggoné mertamu, omong-omongan sing aman.
7. Ngerteni swasana omah. Ana wektuné swasana omah kang diparani lagi ora apik, kaya ta wong sing duwé omah lagi nesunan. Mula yèn iki kedadéyan, amrih apiké dhayoh kudu cepet pamit.