Taman Alas Jayabaya
Taman Alas Jayabaya yaiku salah sawijining taman wisata lan kagolong RTH utawa Ruang Terbuka Hijau kang ana ing Kutha Kadhiri. Taman kang ambané 2,6 héktar iki mapan tepak ing tengah-tengahing kutha, ing Kalurahan Banjaran, Kacamatan Kota, Kutha Kadhiri.[1]. Taman iki uga salah siji saka 6 taman gedhé kang mapan ing Kutha Kadhiri saliyané taman-taman liyané kayata, Taman Sekartaji, Taman Ngrangga, Taman Brantas, Taman Tempureja, lan Memorial Park.[2]
Latar wuri[besut | besut sumber]
Pamaréntah Kutha Kadhiri duwèni kekarepan kanggo ndadèkaké alas kutha iki minangka paru-paru kutha lan papan kanggo nguri-uri alas,[3][4] ditambah anané tuntutan kanggo nambah RTH umum Kutha Kadhiri kang nalika 2017 kaé isih 8 persèn, padahal ana targèt 20% RTH ing Kutha Kadhiri ing taun 2025.[5]
Taman Alas Jayabaya iki dirévitalisasi ing jamané Walikutha Abdullah Abubakar wiwit taun 2017 lan migunakaké dana APBD (Anggaran Pendapatan dan Belanja Daerah) Kutha Kadhiri. Pamaréntah wus wènèh anggaran dana gedhéné 6,6 milyar kanggo yeyasan ing periodé sapisan ing taun 2017, déné ing taun 2018 utawa ing periodé kapindho ana 3,25 milyar dana kang dikucuraké, ana manèh dana DAK (Dana Alokasi Khusus) kang tumeka 750 yuta kanggo pancahyaning taman.[3][4] Ing periodé kapindho iki yasan Play Ground, Taman Edukasi, Bangunan Pengomposan, treteg, lan muwuhi kembang uga wit-witan.[6]
Jinising wit-witan[besut | besut sumber]
Taman Alas Jayabaya iki uga sinebut taman gedhé ing Kutha Kadhiri kang paling akèh duwèni jinis-jinising tanduran tinimbang taman-taman gedhé liyané, kayata, Taman Sekartaji, Taman Ngrangga, Taman Brantas, Taman Tempureja, lan Memorial Park. Ana 14 jinis tanduran kang ana ing papan iki kayata, pelem (Mangifera indica), sirsak (Annona muricata), palem raja (Roystonea regia), nyamplung (Calophyllum inophyllum), trembesi (Albiza saman), flamboyan (Delonix regia), sana (Pterocarpus indicus), kembang kupu-kupu (Bauhina purpurea), kepuh (Sterculia foetida), waru (Hibiscus tiliaceus), mahoni (Swietenia mahagoni), ringin (Ficus benjamina), jambu wèr (Syzygium aqueum), lan blimbing (Averrhoa carambola).[7]
Kagiyatan umum[besut | besut sumber]
Taman Alas Jayabaya iki saliyané minangka papan rékréasi kanggo masarakat, uga papan kang bisa dipigunakaké minangka kagiyatan-kagiyatan kang manpangati liyan-liyané, kayata kang naté dianakaké ing ngisor iki.
Kuwarasan[besut | besut sumber]
Ing Taman Alas Jayabaya naté dianakaké kagiyatan kuwarasan kayata Gerakan Pengendalian Kardiovaskuler dan Diabetes Melitus kang diéloni déning 200 wong saka anggota Klub Jantung Sehat Kutha Kadhiri. Kagiyatan iku diisi kanthi senam, édukasi kuwarasan, lan cèk kuwarasan.[8]
Ngepit bebarengan[besut | besut sumber]
Ing papan iki uga rutin dianakaké kagiyatan ngepit rutin kang diselenggarakaké déning PT. Gudang Garam, kagiyatan iki minangka kagiyatan kang duwèni niyat kanggo njaga kuwarasan, njaga paseduluraning karyawan siji lan liyané, uga nambah semangat karyawan sajroning makarya.[9]
Ngeculaké dara[besut | besut sumber]
Isih padha kaselenggarakaké déning PT. Gudang Garam, kagiyatan ngeculaké dara iki minangka bentuk kabébasan alam lan nguri-uri ékosistem, ana kira-kira 50 manuk dara kang diculaké supaya bisa ngembang biak ana ing taman iki.[9]
Jumat Curhat[besut | besut sumber]
Acara iki minangka kagiyatan kang dianakaké déning Polres Kediri Kota, ing kagiyatan iki pulisi mènèhi papan lan wayah kanggo masarakat kang kepéngin ngaturaké aspirasi, crita, lan sesambatan ngenani masalah-masalah kang lagi diadhepi. Kanthi mengkono, dikarepaké pulisi bisa mbantu ngrampungaké masalah ing masarakat, ngundhakaké rasa gotong royong antara masarakat lan pulisi, uga ngundhakaké profesionalitas pulisi.[10]
Sarana lan wahana[besut | besut sumber]
Sarana[besut | besut sumber]
Sarana kang bisa dipigunakaké ing papan wisata iki kayata kakus umum, bangku umum, papan parkir, lan langgar.[11]
Wahana[besut | besut sumber]
Ana pirang-pirang wahana kang bisa dinikmati déning para wisatawan. Sapisan, Kids Playground papan iki papan kang paling cocog kanggo bocah-bocah cilik dolanan, ing komplèk wahana iki ana wahana-wahana kayata prasatan, bandhulan, lan sapinunggalané. Kapindo, ana Sky Bridge, iki minangka wahana awujud treteg kang mujur saka kidul mangalor kanthi dawa watara 240 mèter. Katelu, ana Jogging Track utawa dalanan kanggo mlayu-mlayu, dalanan iki mubengi taman kanthi bentuk kang menggak-ménggok sapinggiring wit-witan.[11]
Wayah operasional lan karcis[besut | besut sumber]
Taman iki asliné bukak terus 24 jam, nanging disaranaké supaya teka antara tabuh 05.00 nganti 21.00. Ora ana karcis mlebu ing taman iki utawa gratis, karcis mung ing parkiré waé, Rp.2000,- kanggo pit montor lan Rp.3000,- tumeka Rp.5000,- kanggo mobil.[12]
Cathetan suku[besut | besut sumber]
- ↑ Basalamah, Anwar Bahar (2023-03-20). "Menikmati Keindahan Taman Joyoboyo Kota Kediri". Radar Kediri. Dibukak ing 2023-10-14.
- ↑ "Taman-Taman di Kota Kediri Kembali Dibuka Sampai Malam". Times Jabar. 2022-09-18. Dibukak ing 2023-10-14.
- ↑ a b "Wisata Hutan Joyoboyo Kediri semakin Diminati". Pemerintah Kota Kediri. 2019-11-19. Dibukak ing 2023-10-14.
- ↑ a b Dwi, Andhika (2019-01-14). "Cantiknya Wajah Baru Hutan Joyoboyo Kediri dengan 'Skybridge'". Detik News. Dibukak ing 2023-10-14.
- ↑ "Hutan Kota Joyoboyo". Mediun. 2017-11-23. Dibukak ing 2023-10-14.
{{cite web}}:|first=missing|last=(pitulung) - ↑ Online, Bangsa (2018-08-23). "Tambah Wahana, Taman Hutan Joyoboyo Kota Kediri akan Ditutup Sementara". Kumparan. Dibukak ing 2023-10-14.
- ↑ Sulistiyowati, Tutut Indah (2019-04-08). "Jenis-Jenis Pohon Peneduh di Taman Kota Kediri". Jurnal Biologi dan Pembelajarannya. 6: 13–17.
- ↑ "Dinkes Kota Kediri Gelar Edukasi Kesehatan di Taman Hutan Joyoboyo". Suksesi Nasional. 2023-05-26. Dibukak ing 2023-10-14.
- ↑ a b "Wisata Hutan Joyoboyo Kediri semakin Diminati". Antara Jatim. 2019-11-18. Dibukak ing 2023-10-14.
- ↑ Kediri, Polresta (2023-08-05). "Jum'at Curhat Polres Kediri Kota Bersama Ponpes Wali Barokah di Taman Hutan Joyoboyo Kota Kediri". Humas Polri. Dibukak ing 2023-10-14.
- ↑ a b Sukmah, Fenti (2021-01-06). "Hutan Joyoboyo, Pelepas Penat Di Tengah Kota Kediri". Native Indonesia. Dibukak ing 2023-10-14.
- ↑ "Fasilitas Hutan Joyoboyo Kota Kediri, Fungsi dan Tiket Masuknya". 2022-04-01. Dibukak ing 2023-10-14.