Setu Ireng

Saka Wikipédia Jawa, bauwarna mardika basa Jawa

Setu Ireng (Prancis samedi noir) iku ngrujuk ing sawijining dina sajeroning taun, kang ramé dhéwé ing dalanan Prancis. Lumrahé dina iki, kang mesthi dina Setu, tiba ing Setu pungkasan sasi Juli. Nanging ing taun 2007, dina Setu pungkasan ing Juli lan dina Setu kapisan ing sasi Agustus uga diarani dina Setu Ireng.

Dalanan ing Prancis ing dina iki ramé lan macet amarga iku dina kapisan wong-wong liburan mangsa panas. Mliginé kang ramé dhéwé iku Autoroute du Soleil kang manuju menyang Spanyol lan Prancis Kidul. Ing taun 2004 ana kurang luwih 700 kilomèter ing totalé lalu lintas macet.

Genéya dina iki diarani dina Setu Ireng iku déné warna ireng iku kualifikasiné situs wèb Prancis Bison Futé manawa kamacetané lalu lintas iku padhet banget (extrêmement dense). Koran-koran Prancis ngarani dina iki Setu Ireng miturut situs wèb pamaréntah iki. Lumrahé Wong Prancis ngarani dina iki dina-dina olèhé wong mangkat akèh (les jours de grands départs). Ing Basa Walanda, fénoména Prancis iki, wis suwé diarani zwarte zaterdag sadurungé Wong Prancis nganggo tembung samedi noir, loro-loroné tegesé Dina Setu Ireng.