Sesaji Rajasuya
Lakon punika nyariosaken Prabu Puntadéwa ingkang badhé ngawontenaken Sesaji Rajasuya kagem ngurmati para leluhur amargi sampun rampung anggènipun mbangun Kraton Amarta lan Puntadewa ingkang dados raja agengipun. Lelampahanipun Sesaji Rajasuya inggih punika ndhawuhi sarombongan bregada supados sowan dhateng nagari-nagari alit supados sesarengan anggènipun ambangun satunggal nagari. Ananging Prabu Puntadéwa kepingin lelampahanipun Sesaji Rajasuya punika kanthi aman boten ngantos wonten paprangan. Lajeng Prabu Puntadéwa mireng pawartos, menawi Raja Giribraja, Prabu Jarasanda kagungan rencana badhé ngawontenaken Sesaji Kala Rodra. Inggih punika badhé mejahi raja 100 nagari. Raja-raja ingkang sampun pejah punika badhe dipunpancung mustakanipun kagem sesaji dumateng Batara Kala.
Asal-usulipun Prabu Jarasanda inggih punika saking nagari Giribajra. Rajanipun Prabu Briyadata kagungan garwa kalih, sampun dangu boten gadhah putra. Déning Sang Hyang Narada kaparingan pelem pertonggo jiwa cacah setunggal kanggé garwanipun. Nanging pelem punika malah dados rebutan. Lajeng kaliyan Prabu Briyadata pelem wau dipunsigar dados kalih kangge garwa kekalih. Banjur garwa kekalih wau mbobot lan nglairaken jabang bayi ingkang sungsang. Inggih punika namung awujud separo badan. Bayi sigaran cacah kalih dipunbucal dhateng wana, dipun panggihaken Jim Jara. Sigaran bayi badhé dipun gathukaken wutuh dados bayi satunggal. Lajeng si jabang bayi dipun gulawenthah kaparingan nama Jarasanda. Dewasanipun Jarasanda dados tiyang sekti mandraguna, ananging anggadhahi watak angkara. Ramanipun piyambak dipunpejahi lan dipunkuliti didamel tambur.
Prabu Jarasanda sampun nyandra 97 raja ingkang badhé dipunpancung, dados kirang raja 3. Angen-angenipun Prabu Jarasanda kiranganipun 3 wau inggih punika Prabu Kresna, Prabu Puntadéwa lan Prabu Baladéwa. Prabu Puntadéwa kepéngin ngluwaraken 97 raja ingkang sampun dipuntawan kalian Prabu Jarasanda. Lajeng Pandhawa lan Prabu Kresna bidhal nglurug dhateng Griyabajra.
Sasampunipun wonten ing tapel wates nagari Griyabajra, Kresna dhawuh dhateng Janaka supados manah tambur ingkang dumadi saking kulitipun Prabu Briyadata. Ing Pendhapi karaton Giribajra Prabu Jarasanda ngraos bingah, amargi angen-angenanipun malah rawuh piyambak. Prabu Puntadéwa nyuwun dhateng raja-raja ingkang dipuntawan Prabu Jarasanda, supados purun gabung kaliyan Pandawa. Prabu Puntadéwa badhé ngawontenaken sesaji rajasunya. Prabu Jarasanda murka mireng tetembungipun Prabu Puntadéwa amargi raja-raja 97 nagari, luwih remen Sesaji Rajasuya ingkang badhe dipunlampahaken kaliyan Prabu Puntadéwa. Prabu Jarasanda nantang ngajak perang Pandawa, supados masrahaken Prabu Puntadéwa lan Prabu Kresna supados nyekapi cacah satus raja ingkang badhé dipun pancung. Lajeng Werkudara dados murka lan wonten paprangan. Prabu Jarasanda katingal awrat dipunpejai. Wola-wali Rujakpala menthung mustakanipun Prabu Jarasanda, ananging kados mboten kraos. Werkudara mundur lan rawuh dhateng Kresna. Kresna ndhawuhi menawi pejahipun Prabu Jarasanda kedah dipunsigar malih. Werkudara mbacutaken perang, lajeng Werkudara nyekel sukunipun Jarasanda, lajeng dipunsigar dados kalih lan Prabu Jarasanda pejah. Prabu Puntadéwa saged nglaksanakaken Sesaji Rajasuya.