R.M. Wisnoe Wardhana

R.M. Wisnoe Wardhana iku seniman tari, dhalang lan uga aktor film. Wisnoe Wardhana lair ing Ngayogyakarta, 17 Januari 1929 lan sédané surya kaping 18 ing wulan April taun 2002. Bakaté seni, bisa diarani marisi saka wong tuwané kang uga sawijining budayawan kraton. Mula piyambaké wenang nampa gelar Raden Mas saka kraton Ngayogyakarta Hadiningrat.

Amarga lair ing lingkungan kraton, Wisnoe Wardhana bisa ngangsu kawruh srana sekolah kanthi murwat. Ora maido menawa sabanjuré dadi wong kang lantip amarga pasinaoné kang mempeng. Pendidikan dhasar katempuh ing Taman Siswa taun 1940. Mbacutaké pasinaon ing HIS Keputran Yogyakarta (1943-1946). Rampung saka HIS, banjur nempuh pasinaon ing SMP 1 Yogyakarta (1946-1950). Tamat saka SMP banjur mbacutaké pasinaoné ing SMU Padmanaba (saiki SMU 3) Yogyakarta lan rampung taun 1953. Taun 1954 lumebu kuliah ing Fakultas Kedokteran UGM, Yogyakarta. Durung marem kuliah ing Fakultas Kedokteran, Wisnoe Wardhana lumebu ing Fakultas Pedagogik nganti rampung taun 1962. Ing taun 1986 panjenengané ngrampungake program doktor ing IKIP Yogyakarta.

Kepèncuté Wisnoe Wardhana marang seni pancén ora tanggung-tanggung. Panjenengané nganti nyinaoni kanthi mirunggan babagan tari daérah. Jagading seni kaya-kaya pancén ora bisa kapisahaké saka priyayi Ngayogyakarta iku. Saking kepèncuté marang seni nganti sinau tari Bali marang I Wayan Rindi ing Denpasar, Bali, taun 1955. Kejaba tari Bali, tari Sunda uga disinaoni déning garwané Rr. Widati Swandari. Kang dadi guruné Cece Sumantri saka Bandung.

Minangka dhalang, Wisnoe Wardhana naté ngripta péntas wayang sejati kanthi migunakaké 85 paraga. Élokè, kabèh paraga kuwi karipta déning piyambaké, digambar dhéwé. Lakon Kawula-Gusti lan Mawahyu Buwana naté dipéntasaké kanthi nengsemaké.