Pasir Peutuey

Petilasan Pasir Peuteuy kacathet mawa Nomer Inventaris BPCB Banten: 004.01.02.01.94. Petilasan iki mapan ana ing ereng-erenging Gunung Karang, ing lemah duweke Perhutani. Miturut katrangan tinulis ing paprentahan, petilasan Pasir Peuteuy klebu ing laladan Kampung Pasir Peuteuy, Desa Pasir Peuteuy, Kecamatan Cadasari, Kabupaten Pandeglang, Provinsi Banten. Yen miturut tata astronomi (ngelmu babagan tata lintang) sing binabar ing garis lintang lan garis bujur, petilasan Pasir Peuteuy mapan ing koordhinat 06^o 15’ 58,2” Lintang Kidul lan 106^o 05’ 04,6” Bujur Wetan. Tinggalan warisan kabudayan kang ana ing petilasan iki arupa menhir cacah sanga kanthi tatanan mirunggan adhedhasar  gedhene menhir. Miturut etimologi (ngelmu babagan asal-usul tembung), tembung menhir asal saka basa Breton (ing laladan negara Inggris) sing dumadi saka tembung men kang ateges watu lan  tembung hir kang ateges jejeg. Menhir klebu tinggalan warisan kabudayan kang ngrembaka ing jaman megalitik. Sejatine, tinggalan warisan kabudayan kang asal saka jaman megalitik iki kagawe merga anane piandel bab urip sawise pepaten. Adhedhasar piandel iku, para panggilut tradhisi megalitik nglakoni sembahyangan konjuk para leluhur.

Menhir kang paling gedhe ing petilasan iki dhuwure wetara 150 sentimeter. Menhir-menhir liyane luwih cilik lan tinumpuk karo watu-watu dadi ngemperi pasarean kanthi menhir-menhir sing cilik mau minangka maejane. Ana tumpukan ngemperi pasarean cacah papat kang siji lan sijine kinanthi menhir cilik loro. Menhir-menhir iki lumrah sinebut Pahoman Pasir Peuteuy.

Miturut carita kang tinutur turun-temurun, petilasan iki gegayutan karo riwayat Prabu Pucuk Umun lan pandhereke kang sumingkir lan nglakoni tapa ing Pasir Peuteuy sadurunge neruske laku menyang Cibeo. Saperangan wong ngandel menawa Pucuk Umun lan pandhereke dadi cikal-bakal masyarakat Baduy saiki, nanging panggraita iki isih durung dipesthekke.