Parlemèn Éropah

Saka Wikipédia Jawa, bauwarna bébas abasa Jawa

Parlemèn Éropah (Inggris European Parliament) iku sawijining organ parlementèr Uni Éropah sing para anggota dipilih. Bebarengan karo Rad Uni Éropah lan Komisi Éropah, lembaga iki nglaksanakaké fungsi législatif UE. Parlemèn iki anggotané ana 751 (sadurungé 766), sing dadi timbalan élèktorat gedhé dhéwé sadonya (sawisé India) lan dadi élèktoratg démokratis antar-bangsa sing gedhé dhéwé sadonya (mawa 375 yuta pamilih ing taun 2009).

Parlemèn Éropah kapilih sacara langsung saben limang taun déning pamilihan kabèh sing ndarbèni hak wiwit taun 1979. Nanging gunggungé para pamilih wis sangsaya medhun mawa saben pamilihan umum, wiwit taun iku, lan wiwit taun 1999 dadi sangisoré 50%. Ing taun 2014 gunggungé para pamilih dadi 42,54% saka kabèh pamilih Éropah.