Naraguna:Wirjadisastra/Lapuran Wikimania 2018

Wikimania 2018 iku pasamuwan Wikimania angka 14 kang kagelar ing Cape Town, Afrikah Kidul. Ing jagat paguyuban Wikimedia, Wikimania minangka pasamuwan taunan kang ancasé nglumpukaké wong-wong kang ngopèni Wikipédia, Wikikamus, Wikiwarta, lsp. (proyèk-proyèk Wikimedia) saka saindengé donya supaya padha andum pangalaman lan kawruh. Pangalaman lan kawruh kang diéntukaké ing Wikimania banjur digawa mulih menyang nagarané lan didum marang paguyuban lokal. Pamrihé, pangalaman lan kawruh mau bisa njalari tuwuhé krenteg ing paguyuban lokal anggoné ngopèni proyèk-proyèk Wikimedia lokal.

Ana wong loro saka Wikipédia Jawa kang olèh kalodhangan ngèstrèni acara iki, ya iku aku karo Amy. Ing kaca iki, aku andum pangalaman lan kawruh kang dakéntukaké nalika nekani Wikimania 2018. Pangalaman lan kawruh iki muga-muga bisa njalari tuwuhé paguyuban Wikipédia Jawa lan sansaya beciké mutu Wikipédia Jawa minangka bauwarna basa Jawa kang dadi jujugané akèh wong.

Lapuran iki katata miturut kronologiné lelakonku kawit pangkatku nganti ulihku saka Wikimania 2018, tanggal 15-23 Juli 2018.

Lelakon

15-16 Juli 2018: Awak dhéwé mangkat saka Ngayogyakarta pukul 19 lan tekan ing Jakarta pukul 20. Awak dhéwé mangkat manèh pukul 1 (UTC+7) lan tekan ing Dubai pukul 5 (UTC+3). Ing Papan Gegana Internasiyonal Dubai pranggulan karo sawenèh panyarta Wikimania kang padha-padha arep menyang Cape Town. Montor maburé awak dhéwé banjur nggegana pukul 8 (UTC+3) lan tekan ing Cape Town pukul 16 (UTC+2). Awak dhéwé tekan hotèl pukul 18 lan langsung turu amarga keselé.
17 Juli 2018: Dina iki durung ana kagiyatan Wikimania, mula aku mèlu rombongan panyarta Wikimania cacah 18 wong kang dolan menyang sawenèh papan pariwisata ing Cape Town, ya iku: Pasisir Boulders (Boulders Beach) lan Pongol Pangajab Becik (Cape of Good Hope). Dolané awak dhéwé mrana numpak sepur komuter. Dolan ing Pasisir Boulders iku dadi pangalamanku kang ping pisan anggoné weruh pinguwin.
18 Juli 2018: Dina iki minangka dina pra-pasamuwan angka siji. Aku nekani Learning Days kang dipandhégani Maria Cruz. Aku uga nyempetaké nekani acara Hackathon lan mèlu ing golongan basa kang dipandhégani Amir. Ing kono, aku wiwit mertal sawenèh layang ing translatewiki.net menyang basa Jawa. Sawisé iku, aku bali menyang sèsi Learning Days manèh. Dina iki aku tepungan karo sawenèh wong, mligi Josh Lim saka Filipin lan Tai-yuan saka Research Center for Indigenous Education ing Taiwan, lan Amir Aharoni saka WMF.
19 Juli 2018: Dina iki minangka dina pra-pasamuwan angka loro. Aku ngrampungaké layang-layang kang wiwit dakpertal ing dina sadurungé. Wusana, aku kasil mertal kaca ngarep situs Wikidata lan saiki situsé wis cumepak ing basa Jawa. Soréné, aku mlaku-mlaku menyang padunungan aran Bo-Kaap. Saka anggonku mlaku-mlaku iku aku ngerti sajarahé padunungan wong Malayu ing Cape Town. Wenginé, aku mèlu acara Pista Sugeng Rawuh (Welcome Reception). Ing kono, aku tepungan karo sawenèh wong kaya ta Isaac saka Zambia, Neil saka WMF, Revi saka Meta, Freddie saka Wikitongues, lan Bobby saka WMZA kang minangka panitya Wikimania 2018. Bobby pranyata tau ngangsu kawruh ing Indonésia, mula dhèwèké bisa ngendikan basa Indonésia.
20 Juli 2018: Pasamuwan dina kapisan. Dina iki aku nekani acara kang dipandhégani Helmi saka Kanadha kanthi sesirah "What tools do we need for small Wikis to increase content and quality?". Sabanjuré, aku mligi nekani lokakarya Wikidata kang dipandhégani Asaf saka WMF. Saka kono aku sinau akèh bab Wikidata lan carané njupuk dhata lumantar SPARQL. Amarga SPARQL narik kawigatènku, aku njajal-njajal nganggo SPARQL tekan surup banjur nekani acara sarasèhan (meetup). Sarasèhan Asiah kawiwitan pukul 19 (UTC+2). Ing kono aku tepungan karo akèh panyarta Wikimania 2018 kang saka Asiah lan Ostrali. Kang dadi rembug ing sarasèhan iku mligi Pasamuwan ESEAP 2019 kang bakal kagelar ing Fremantle, Perth, Ostrali. Pasamuwan ESEAP 2019 pranyata njalari sawenèh wong saka njaban wewengkon ESEAP péngin teka, nanging bokmanawa panitya ora bakal awèh jatah wong kang akèh, kaya déné ing Bali sasi Mèi 2018 wingi kang mung kanggo wong 58. Ing sarasèhan iki uga karembug Wulan Asiah Wikipédia kang wis lumaku sawatara taun.
21 Juli 2018: Pasamuwan dina kapindho. Saka ésuk tekan soré aku nekani sawenèh sèsi, mligi kang gegayutan karo Basa (Language), Cecandhak (Outreach), lan Tèknologi (Technology). Wenginé, aku nekani sarasèhan Wikipédia ing basa-basa Austronésiah. Panyarta sarasèhan iki mung sithik amarga ora akèh panyarta Wikimania 2018 kang ngopèni Wikipédia basa Austronésiah, mung wong loro saka Wikipédia Jawa, wong siji saka Wikipédia Tagalog, lan wong papat saka Research Center for Indigenous Education ing Taiwan dikancani Liang saka WMTW, uga Amir Aharoni saka WMF. Mangkonoa, rembugané nganti rong jam. Kang karembug kaya ta carané nuwuhaké paguyuban lan carané nglairaké Wikipédia ing basa lokal Austronésiah, lan masalah-masalah apa kang dialami Wikipédia-Wikipédia ing basa Austronésiah.
22 Juli 2018: Pasamuwan dina katelu. Aku ora akèh nekani sèsi ing dina iki amarga diundhang Liang supaya nekani sarasèhan Stratègi kang dipandhégani Kaarel lan kabacutaké sarasèhan ESEAP. Ing sarasèhan Stratègi, aku kandha yèn Wikipédia Jawa isih cilik lan lagi tuwuh. Ora ana masalah bab basa kanggo sesambungan ing paguyuban Wikipédia Jawa, amarga saben wong bisa milih nganggo basa Jawa utawa basa Indonésia nalika sesambungan. Sesambungané paguyuban Wikipédia Jawa bisa sarana kaca Wikipédia, WhatsApp, lan Facebook. Ing sarasèhan ESEAP, awak dhéwé ngrembug luwih jero bab paguyuban Wikimédia ing wewengkon ESEAP, mligi bab sesambungan antarané warga ESEAP. Mula, ing sarasèhan iki, awak dhéwé ngepyakaké paguyuban ESEAP ing manéka madya samuwa (social media), kaya ta Telegram, WhatsApp, lan Facebook, uga ing milis. Sawenèh wong uga kanthi sukalila dadi kang tanggung jawab ing madya samuwa mau. Sorené, bubar sèsi panutup, aku direkam wong Wikitongues jeneng Daniel. Daniel iku kancané Freddie kang daktepungi nalika Pista Sugeng Rawuh. Wong loro iku barengan ngadegaké Wikitongues. Ing rekamané, aku caturan monolog nganggo basa Jawa. Vidhiyoné bakal kamot ing saluran Wikitongues ing YouTube nalika wis rampung kabesut. Wenginé, aku mèlu acara Pista Panutup (Closing Party). Ing kono aku nonton jogèd lokal kanthi kang jogèd sandhangan warna-warni lan ana kang macak kaya ondhèl-ondhèl Batawi. Ing acara iki aku tepungan karo Base saka Ukraina.
23 Juli 2018: Dina iku aku nggegana saka Cape Town pukul 13 (UTC+2). Aku karo Amy wis tekan Papan Gegana Internasiyonal Cape Town nalika pukul 11. Sasuwéné ngentèni iku, awak dhéwé ditekani Subhashish, panyarta saka Odisha ing Indhia. Dhèwèké iku kang ngopèni situs Openspeaks.com. Aku karo Amy banjur direkam dhèwèké caturan nganggo basa Jawa. Ing caturan iku, awak dhéwé ngobrolaké dhemit-dhemit kang kalumrah ing Tanah Jawa. Pamrihé ngrekam mangkono kaya ancasé Wikitongues, ya iku murih bisané basané langgeng. Cukup suwé anggoné ngrekam, nganti ora krasa montor maburé wis siyap lan awak dhéwé nggegana menyang Dubai. Awak dhéwé tekan Dubai pukul 1 (UTC+3), banjur mabur manèh menyang Jakarta pukul 5 (UTC+3). Satekané Jakarta pukul 16 (UTC+7), awak lanjut nggegana manèh pukul 19 (UTC+7) lan tekan Ngayogyakarta watara pukul 20 (UTC+8).

Panutup

Lelakon Wikimania 2018 iki dadi pangalamanku kang kapisan nekani acara Wikimania. Ing acara iki aku tepung lan weruh manéka rupa wong kang ngopèni situs Wikipédia lan situs-situs liyané kang nunggal babon. Saka kana uga aku sinau bab kaanané Wikipédia Jawa lan duwé rancangan apa kang bakal daklakokaké kanggo tuwuhé Wikipédia Jawa.

Iki tulisanku kang dakpacak ing akun madya samuwa (social media) Wikipédia Jawa bab gèsèhing kawruh ngenani kabudayan Jawa kang dakkonangi ing Wikidata. Facebook (pranala) lan Instagram (pranala).
Iki kasilé lakufoto (photowalk) kang dakayahi nalika ing Cape Town: album. Bokmanawa ayahan kang padha bisa dicakaké paguyuban Wikipédia Jawa ing panggonané dhéwé-dhéwé.