Naraguna:Devi Umi Fatonah

Angin Segara Gawe Wisa Dening : Devi Umi Fatonah

Srengenge uwis katon arep angslup. Suara ombak nambahi kangen ati iki. Aku lingguh ana ing pinggir segara karo ngematke kahanan segara. Kelingan 3 taun kepungkur lingguh neng kono bareng cah lanang kang daktresnani. Wonge tau ninggal janji karo aku, bakal ketemu meneh neng panggon iki menawa wis bali seka Jakarta. “Hayo lagi ngapa?”, suarane Bambang ngageti aku. “Jan kowe ki lho, gawe kaget uwong wae”, wangsulanku rada sengol. “Lha kowe ki ngalamun wae, mikir apa ta?”, wonge takon. “Ra mikir apa-apa kok, e kowe kok isa reti nek aku neng kene?”, pitakonku. “Aku mau menyang omahmu, jare ibumu kowe neng pinggir segara, njur tak susul ndhene”, wangsulane karo mesam-mesem. “O ngono, eh aku arep bali mulih, wis surup”, aku karo ngadek siap-siap arep bali. “Sik-sik, aku arep omong penting karo kowe”, Bambang nututi ngadek. “Ana apa ta??”, wangsulanku. “Dadi ngene, Astuti Wulandari, awakdhewe kuwi wis kekancan 3 taun, sesok awakdhewe wis kuliah. Aku wis ngerti apik eleke kowe, semana uga kowe neng aku. Dadi ngene, aku kuwi tresna marang kowe, uwis ket biyen lehku mendhem tresna neng kowe, apa kowe gelem nyambung tresna karo aku, Ti?” pangucape Bambang. “ Kowe ki ngomong apa ta, Mbang?” pitakonku. “Aku tenanan, iki blaka seka atiku sik paling njero”, wangsulane karo melas. “ Mbang ngene, kowe kuwi wis tak anggep kanca dhewe, dadi aku ra mungkin nek karo kowe, aku njaluk pangapura Mbang”, wangsulanku banjur aku lumayu mulih ninggalke Bambang sik isih ngadeg dhewe neng kana. Aku tekan ngomah langsung lumebu kamar. Aku ijih ora nyangka Bambang bakal omong kaya ngono neng aku. Aku ora gelem ngapusi, tekan saiki aku ijih tresna karo wong liya, tur aku ya ora gelem nglarani atine Bambang. Banjur seka kuwi aku mutuske yen aku karo Bambang kekancan wae. Dina iki aku ospek lumebu kuliah. Atiku seneng tenan. Bakal tambah kanca anyar seka daerah ngendi-endi. Sambi nunggu anggone istirahat aku lungguh neng kursi cerak wit ringin. Lagi arep lumakuu ndhana, ujug-ujug, gubrak!!!!! “Nyuwun pangapunten mbak, kula boten sengaja”, wangsulane bocah lanang sing padha-padha mahasiswa anyar. “Boten napa-napa kok”, wangsulanku karo ngresiki rok amarga reged. Lha pas ngematke uwonge, aku kaget, rasane kaya arep semaput, dhuh Gusti apa bener cah lanang iki uwong sik daktresnani tekan saiki. “Eh Astutiiiiiii, kowe Astuti, ta?”, pitakonane kana. “I..i..iya, aku Astuti. Kowe Aji ta?”, anggonku takon. “Iya, aku Aji. Piye kabarmu? Wis suwe banget ora ketemu”, kana takon. “Apik, Ji. Pancen wis suwe banget, ket kowe pindah sekolah neng Jakarta kae. Lha kowe dhewe piye?”, aku takon. “Apik Ti aku”, wangsulane Aji. “Aji!”, ana wong wadon sing nyeluk Aji neng tetengahaning aku karo Aji lagi takon-takonan kabar. Wong wadon mau nyeraki aku karo Aji. “Iki jenenge Sekar, Ti. Deke pacarku”, Aji ngenalke. Aku karo wong wadon mau banjur salaman. Aku karo ijih ora nyangka. Jebul Aji uwis duwe yang. “Sekar”, wong wadon mau karo salaman neng aku. “Astuti”, wangsulanku. Bar kuwi aku mung meneng wae. Atiku kelara-lara. Aji wis ra kelingan janjine biyen karo aku. Dhuh Gusti lelakon apa iki. Wong loro kuwi mau sibuk omong-omongan dhewe, aku njur pamitan lunga, wis ra kuat aku ndelokke Aji karo wong liya. “Ji, Kar, aku pamit disik ya”, aku karo ngadeg. “Ya Ti”, wangsulane Aji. “Nggih mbak, ngatos-atos”, wangsulane Sekar. Ati remuk tenan, aku ora isa ngampet nangis. Pikiranku amburadul ora karuan. Sirahku mumet banget. Rasane kya muter-muter. Tangi-tangi wis ana neng ruang UKS. Jebul aku mau semaput. Seminggu bar kedadeyan kuwi, Bambang mara neng ngomahku. Jebul wonge ijih tetep ngerteni aku senadyan aku wis gawe lara atine. Aku dadi trenyuh, ora mbayangke nek aku dadi Bambang. Lekas dina kuwi aku mbukak ati kanggo wonge. Angin segara pancen nggawe wisa, ananging wisa kuwi mau uwis ditambani karo kancaku dhewe, Bambang.