Margareth Widhy Pratiwi
Margareth Widhy Pratiwi (lair ing Yogyakarta, 27 Dhésèmber 1961) ya iku panulis wanita ugi putri saking pasangan S. Cipto Setiyono (lair ing Magelang, 1935) kaliyan Sri Kasiyah ingkang purna pendhidhikan wonten ing SD Kanisius Wirobrajan (1974), SLTP Pangudiluhur I (1977), sarta SMA Marsudi Luhur (1981). Panjenenganipun mboten mendhet pendidikan ingkang linuwih amargi bibar SMA lajeng krama kaliyan Anton Ys Taufan Putera, tiyang saking Banten alumni UGM ingkang sakmenika dados guru teater[1].
Panjenenganipun kagungan laré cacahipun pitu - 3 kakung lan 4 estri. Panjenenganipun sakmenika lenggah wonten Jalan Nitiprajan RT 02/20 No. 42D, Ngestiharjo, Yogyakarta 55182.
Panjenenganipun sampun kagungan kathah ripta kados cerbung, cerkak, ugi artikel prekawis sastra, kewanitaan, kaliyan ilmu pengetahuan sanesipun ingkang sampun dipunpacak wonten ing majaah kaliyan surat kabar (Mekar Sari, Jaya Baya, Kandha Raharja, Dharma Nyata, Putra Kita, Simponi, Gatotkaca, Kartika, Nova, lan sapanunggalané. Panjenenganipun asring ngagem asma sanès inggih menika M.G. Widhy Pratiwi, Emge Widhy Pratiwi, Aprodety (putra pambarep), Tiwy Emge, kaliyan Endang Bratajaya.
Kinarya pangripta sastra Jawa, panjenenganipun sampun nampi panghargan kados (1) cerkak "Sunduk Gunting Tatu Loro" juara I Lomba Penulisan Cerpen Jawa ingkang kawontenaken dening Balai Penelitian Bahasa Yogyakarta, (2) cerkak "Langite Isih Biru" dados juara II Lomba Penulisan Cerpen ingkang kawontenaken dening Keluarga Penulis Semarang (1983), (3) cerkak "Mulih" ingkang dados juara II Lomba Penulisan Cerpen Jawa ingkang kawontenaken dening Balai Penelitian Bahasa Yogyakarta minangka Hari Pendidikan Nasional (1984).
Rujukan[besut | besut sumber]
- ↑ Prabowo, Dhanu Priyo; Widati, Sri; Rahayu, Prapti (2015). Ensiklopedi Sastra Jawa. Yogyakarta: Balai Bahasa Yogyakarta. kc. 319–322. ISBN 9789791852357.