Lola rennt

Saka Wikipédia Jawa, bauwarna mardika basa Jawa
Loncat ke navigasi Loncat ke pencarian

Lola rennt utawa ing basa Inggris diwèhi sesirah Run Lola Run iku sawijining filem thriller Jerman weton taun 1998. Ukara Jerman iki tegesé 'Lola mlayu'. Lola iku paraga baku filem iki. Filem iki ditulis lan disutradarani Tom Tykwer, bintang mligi ya iku Franka Potente minangka Lola lan Moritz Bleibtreu minangka Manni. Critané prakara wong wadon kang kudu olèh dhuwit DM100.000 sajeroning 20 menit kanggo nylametaké uripé pacangé. Telung skénario filem iki pangaribawané filem Blind Chance gawéané Kieślowski. Sawisé dhèwèké tilar donya, Tykwer nyutradarani filem Heaven.

Filem iki banjur nuduhaké wektu 20 menit ping telu, saben dituduhaké ana prabédan détail cilik, kang marakaké alur carita lan pungkasané dadi séjé (sawijining wujud èfèk kupu-kupu kang mèmper simpul wektu).

Filem iki dipilih minangka èntri Jerman minangka filem nagara ngamanca kang apik dhéwé nalika Academy Awards kaping 71, nanging ora dinominasèkaké babar belas.

Sinopsis[besut | besut sumber]

Omah apartemèn ing dalan Albrechtstraße (Berlin-Mitte), papané telung pérangan filem wiwit

Lola (Franka Potente) ditilpun pacangé Manni (Moritz Bleibtreu). Manni iku durjana kroco cilikan kang lagi waé njupuk dhuwit DM 100.000 nalika sadurungé nglakoni aksi durjana. Lola wis sarujuk nemoni awaké ing papan kadurjanan lan ngeteraké awaké menyang bosé Ronnie lan mènèhaké dhuwité. Lola wis nyoba nanging pit montoré dicolong nalika arep mrana. Manni kang nggawa dhuwité ing tas kresek banjur numpak sepur jero lemah. Nalika weruh kondhèktur, dhèwèké panik, awit ora tuku tikèt. Banjur dhèwèké mlayu lan tasé ditinggal. Nalika kèlingan manèh, dhèwèké weruh ana wong glandhangan kang njupuk tasé lan nyekel dhuwité. Manni njajal ngoyak sepuré kang lagi mangkat nanging ora kena.

Manni banjur nilpun Lolla saka tilpun umum. Dhèwèké nepsu manawa Lola ora nggatèkaké awaké. Dhèwèké c elathu manawa kudu olèh dhuwit DM 100.000 sajeroning 20 menit, yèn ora Ronnie bakal matèni awaké. Manni banjur kandha dhèwèké bakal ngrampog sawijining supermarket (pasar swaladèn) manawa Lola ora mara. Lola njajal ngélikaké aja, amarga iku ora apik. Lola banjur kandha awaké, dikon nunggu 20 menit awit dhèwèké nyoba golèk dhuwité. Lola banjur mutusaké njaluk bapakné dhuwit, amarga bapakné iku dirèktur bank.

Sawisé tilpun iki, banjur filem iki sabanjuré dipérang dadi telung pérangan. Saben pérangan diarani run utawa playon déning Lola. Ing saben pérangan Lola nyoba golèk dhuwit lan nylametaké Manni. Saben playonan diwiwiti kaanan kang padha, nanging ngrembaka séjé lan wusanané uga séjé. Banjur ing saben playonan ana kadadéan-kadadéan kang dituduhaké lan iku sajatiné kasilé patemoné Lola karo wong-wong iku, Lola dadi kang marahi kadadéan iku kabèh.