Kebleg

Kebleg ya iku lelembut ing budaya Jawa kang lumrahé ana ing pawon. Kebleg iki wujudé kaya pitik jago, lan yèn wayah soré, kebleg bakal nyuwara "bleg-bleg-bleg." Biyasané kebleg njedhul kanggo medèn-medèni bocah cilik, nanging uga kadhang kala kebleg ngancani wong kang masak ing pawon.

Lelembut iki bisa dadi manut yen diopèni kanthi tenanan lan apik, nanging yèn disiya-siya uga bakal mbebayani. Biyasané lelembut iki manggon ing sawijining dhingkel, ya iku perangan saka tungku (luweng). Yèn wong kang masak nganggo kayu bakar, lelembut iki bakal njaga geniné, mulané wong kang masak kasebut aja nganti nyebul geniné amarga bakal mbebayani. Lelembut iki uga ora seneng yèn ana wong kang gegeni, utawa cedhak-cedhak karo geni lan ngungkuri dhingkelé, wong kang gegeni kasebut bisa kobong.