Dewi Renuka

Saka Wikipédia Jawa, bauwarna mardika basa Jawa

Dewi Renuka iku garwané Maharesi Jamadagni ing Padhepokan Sambiharja. Wujude putri sulistya ing warna. Awake weweg baud ngadi sarira, sarta gedhe nafsu birahine. Karo Maharesi Jamadagni, Sang Dewi patutan 5 lanang kabeh. Putra mbarepe asma Rumawan, putra panenggak asma Susena, putra panengah asma Wasu, putra sumendhi (kakang ragil) asma Wiswawasu, lan putra ragil asma Ramaparasu.

Amarga Maharesi Jamadagni tansah nengenake kasutapane, wekasane Dewi Renuka ngrasakake kesepen. Yen jaman saiki diarani Jarang Dibelai (JABLAI) ngono kae. Para maos temtu bisa mbayangake yen wanita arang didemok kakunge. Ing mangka Dewi Renuka iku jinis wanita kang gedhe nafsu birahine, mesthi wae gampang kena godhaning iblis.

Sawijining dina, nalika Dewi Renuka arep siram ing kali, dumadakan priksa priya bagus njenthara kang pinuju siram ing kali, mangka dhewekan. Jaran titihane dicencang ing wit Nagasari, gendhewa lan jemparinge temumpang ing busana agemane. Sajake, priya iku mentas beburu ing alas. Dewi Renuka datan kuwat ngampah birahine. Sigra melu-melu nyemplung ing kali, lelumban ora adoh saka papane priya bagus mau. Bareng pandulune tempuk netra, Dewi Renuka asung sasmita supaya Sang Bagus nyaket.

Priya mau nepungake yen salugune narendra ing Martikawata, jejuluke Prabu Citrarata. Dewi Renuka walaka yen piyambake garwané Maharesi Jamadagni. Sang Maharesi mung nengenake tapa bratane, Sang Dewi ora tau dijamah. Prabu Citrarata wis tanggap karo karepe Dewi Renuka. Kekarone banjur andon asmara ing kali nganti tutug. Lagi iki Dewi Renuka ngrasakake marem banget. Jebul Prabu Citrarata baud olah asmara.

Sawise rampung, Dewi Renuka tumuli mentas ing dharatan. Banjur kondur menyang padhepokan.

Maharesi Jamadagni iku pandhita waskitha. Ngerti sadurunge winarah. Sang Maharesi datan kasamaran marang tumindake Dewi Renuka kang murang kasusilan. Nuli nimbali putrane 5 pisan, didhawuhi mateni ibune. Nanging, putra no 1 tekan no 4 ora ngestokake dhawuhe ramane, ora mentala mrejaya ibune. Maharesi Jamadagni duka, putrane 4 mau diupatani sirna akal budine.

Maharesi Jamadagni banjur dhawuh marang putra ragile, kadhawuhan mateni ibune. Ramaparasu matur sendika, banjur nyandhak kampake, ditamakake ing gulune ibune. Gulu pedhot, mustakane Dewi Renuka gumlundhung ing jerambah.

Maharesi Jamadagni rena penggalihe, nuli ndangu putrane, darbe panyuwun apa, bakal diudaneni. Ramaparasu darbe panyuwunan:(1) Nyuwun Dewi Renuka ibune bisa bali urip maneh, (2) Tumindake mateni ibune bisaa kalis ing dosa, (3) Kadange 4 bisaa kasinungan akal budi maneh kaya maune, (4) Aja ana satriya kang kadigdayane ngungkuli Ramaparasu, (5) Nyuwun didongakake dawa umure.

Panyuwune Ramaparasu kinabulake. Wiwit iku, kulawargane Maharesi Jamadagni bali ayem tentrem maneh.