Agrowisata Blimbing Karangsari

Tambah pranala
Saka Wikipédia Jawa, bauwarna mardika basa Jawa

Agrowisata Blimbing Karangsari yaiku papan wisata awujud kebon blimbing kang ana ing Kalurahan Karangsari, Kacamatan Sukareja, Kutha Blitar. Kebon iki ambané ana 5,5 héktar kanthi cacahing tanduran nganti 1993 wit, déné ana 50 among tani kang mèlu anglakokaké kebon iki.[1] Papan wisata iki uga makolèh pangaji-aji saka pamaréntah, kayata pangaji-aji Ketahanan Pangan ing 2010 ing Istana Negara, pangaji-aji Gubernur Jawa Wétan sajroning Inovasi Teknologi Produk Unggulan 2013, sarta Anugerah Produk Pertanian Berdaya Saing 2013 ing Jakarta.[2] Ora lali, Agrowisata Blimbing Karangsari iki minangka siji-sijiné papan wisata binanis tetanèn ing Kutha Blitar.[3]

Sajarah[besut | besut sumber]

Ngrembakaké blimbing[besut | besut sumber]

Kalurahan Karangsari dikenal minangka kalurahan kang duwèni potènsi blimbing kang ngrembaka banget lan duwèni variétas blimbing ajeneng blimbing Karangsari. Blimbing iki bibité saka Bangkok, Thailand lan kanggo sapisanan dikrembakaké lan ditandur ing Karangsari déning warga Karangsari kang paring asma Slamet ing tahun 1985. Banjur kagiyatan iki diterusaké déning Imam Surani lan ayasa Kelompok Tani Marga Mulya ing taun iku pisan.[4][5][2]

Sumebaring winih lan dumadiné papan wisata[besut | besut sumber]

Ing taun 1990-an dhèwèké awit ngadumaké bibit-bibit anyar iku mau marang para warga Karangsari supaya ing wayah mengko tlatah Karangsari bisa dadi kampung kang binasis agro. Pungkasan saka adum-adumé iku njalari saben omah ing Karangsari pinaès wit blimbing ing ngarep omah. Ing wayah sabanjuré, Imam Surani lan para paraga masarakat duwèni karep kanggo ngajokaké proposal marang pamaréntah kanggo andadèkaké Karangsari minangka jujugan wisata blimbing. Pungkasan pamaréntah nyarujuki apa kang wus dikarepaké déning masarakat Karangsari lan ing taun 2007 kanthi rasmi Karangsari dumadi désa agrowisata blimbing. Lan ing taun 2010 kanthi rasmi papan iki binukak kanggo umum minangka papan wisata édukasi.[6]

Ing taun 2020 waé wus ana kira-kira 25 ewu wit blimbing ing Karangsari.[5] Imam Surani naté diundang menyang Kuala Lumpur, Malaysia ana 15 dina suwéné kanggo nekani patemon teknologi sa-Asia Kidul-wétan. Nalika blimbing Karangsari ginawa menyang Kuala Lumpur, jebulé saka nagara-nagara sa-Asia Kidul-wétan ora ana kang bisa madhani ukuran blimbing iki, yaiku 500-800 gram.[7]

Variétas blimbing Karangsari[besut | besut sumber]

Bentuk pisik[besut | besut sumber]

  • Bentuk woh: Lonjong atos kanthi lingsir 5
  • Warna woh nom: ijo
  • Warna woh mateng: jingga nggilap
  • Warna tepi lingsir: kuning ijo
  • Abot: 350 - 600 gram/woh
  • Dawa: 20 - 21 cm
  • Ubengan: 30 - 32 cm
  • Kajeroning lingsir: 3,19 - 3,68 cm
  • Tèkstur daging woh: rada sinerat[8]

Rasa lan ambu[besut | besut sumber]

  • Rasa woh nom: rada asem lan kasar
  • Rasa woh mateng: legi seger
  • Ambu woh mateng: arum[8]

Kadar jat[besut | besut sumber]

  • Asem malat: 0,49 – 0,60%
  • Vitamin C / 100 gram: 6,75-9,36 mg[8]

Tetanduran[besut | besut sumber]

  • Produksi / wit / taun: 400 – 600 kg
  • Umur panen woh: 65-70 dina sawusé mekaring kembang
  • Katakelan mring wèrèng: ora takel mring laler woh (Dacus dorsalis )
  • Usum woh: saindhenging taun
  • Wiwit woh: umur 1-2 taun
  • Produksi paling dhuwur: sasi Nopèmber-Dèsèmber[8]

Produk olahan blimbing[besut | besut sumber]

Ana manèka warna blimbing kang bisa diolah dumadu pirang-pirang produk kayata, blimbing kang kematengen bisa diolah dumadi opak gambir, déné blimbing afkir bisa diolah dumadi kripik blimbing, manisan garing blimbing, dan puré blimbing.[2]

Rute[besut | besut sumber]

Saka Alun-Alun Blitar wisatawan bisa njupuk arah mangulon nganti tinemu prapatan bangjo. Banjur njupuk jalur kiwa nganti nemu bangjo manèh lan njupuk jalur lurus watara sakilomèter nganti tumeka ing pom bènsin. Manawa wus tumeka ing kono, papan wisata Blimbing Karangsari mapan ing buri pom bènsin iku kanthi mlebu gang ing sisih loring pom bènsin.[9]

Wayah operasional lan karcis mlebu[besut | besut sumber]

Wayah operasional papan wisata iki saben dina, bukak awit jam 08.00 WIB tumeka jam 16.00 WIB. Karcis mlebuné Rp.10.000,- saben wong. Déné rega blimbing per kiloné Rp.10.000,-.[10] Karcis mlebuné iku wus kalebu welcome drink sari woh blimbing kang diolah dhéwé déning masarakat kono.[11] Papan wisata iki ditekani déning watara 2000 wisatawan saben sasiné, lan ing pungkasing minggu bisa nganti 500 wong.[12]

Sarana[besut | besut sumber]

  • Kakus
  • Mesjid
  • Mini Market
  • Omah mangan
  • Kafé
  • Sewa kendaraan[13]

Cathetan suku[besut | besut sumber]

  1. ↑ Hadi, Samsul (2023-01-23). "Menggeliat Lagi, Agrowisata Belimbing Karangsari Kota Blitar Ramai Pengunjung Lagi di Momen Liburan". Surya.co.id. Dibukak ing 2023-10-10.
  2. ↑ a b c Lestari N., Widya (2016-08-12). "Pesona Belimbing Unggul Hasil Inovasi Warga Desa Karangsari, Blitar". Good News From Indonesia. Dibukak ing 2023-10-11.
  3. ↑ Kurniawati, Rizky; Marlena, Novi (2020-05-14). "Analisis SWOT Sebagai Dasar Perencanaan Strategi Pemasaran pada Agrowisata Belimbing Karangsari Kota Blitar". Jurnal Manajemen dan Bisnis Indonesia. 6: 191–203. Diarsip saka sing asli ing 2023-01-14. Dibukak ing 2023-10-11.
  4. ↑ Putri, Rahman Kurnia. Ditulis ing Tulungagung. "Pemberdayaan Masyarakat Melalui Pengembangan Program Maya Juwita di Agrowisata Belimbing". Fakultas Ekonomi & Bisnis Islam. Skripsi. IAIN Tulungagung: 71-75.
  5. ↑ a b "Mengenal Imam Surani, Penggagas Agrowisata Belimbing Karangsari". Radar Tulungagung. 2020-12-31. Dibukak ing 2023-10-10. {{cite web}}: |first= missing |last= (pitulung)
  6. ↑ "Tiket Masuk Agrowisata Belimbing Karangsari Blitar Terbaru 2020, Cek Daya Tariknya!". Sanflawer. 2020-02-29. Dibukak ing 2023-10-11.
  7. ↑ Haqi, Diandra (2020-06-09). "Pesona Kampung Belimbing, Ikon Wisata Alam Kota Blitar (Hari ke-9)". Gurusiana. Dibukak ing 2023-10-11.
  8. ↑ a b c d Siniati, Tini (2009). "Varietas Unggul Belimbing Karangsari". Balai Pengkajian Teknologi Pertanian Jawa Timur. Dibukak ing 2023-10-14. {{cite web}}: |first= missing |last= (pitulung)
  9. ↑ Saputra, Rizky (2023-02-28). "Agrowisata Belimbing Karangsari, Destinasi Menarik Berlibur Bareng Anak-Anak di Blitar". Blitarterkini.com. Dibukak ing 2023-10-10.
  10. ↑ Romanov, Madeline (2023-09-14). "Wisata Agro Karangsari : Harga Tiket, Foto, Lokasi, Fasilitas dan Spot". Tempat Wisata. Dibukak ing 2023-10-11.
  11. ↑ Fikri, Dimas Andhika (2020-10-22). "Serunya Belajar Sambil Petik Buah di Agrowisata Karangsari yang Dikunjungi Khofifah". Oke Travel. Dibukak ing 2023-10-11.
  12. ↑ Aziz, Qithfirul (2022-11-04). "Tim Juri EJTA 2022 Turun Lapangan Nilai Agrowisata Belimbing Karangsari". Inews Blitar. Dibukak ing 2023-10-11.
  13. ↑ "Agrowisata Karangsari Karangsari - Kota Blitar". Wesata.id. Diarsip saka sing asli ing 2022-05-29. Dibukak ing 2023-10-11.
Dijupuk saka "https://jv.wikipedia.org/w/index.php?title=Agrowisata_Blimbing_Karangsari&oldid=1671511"