Pasar Glondhongan

Pasar Glondhongan ing wayah wengi

Pasar Glondhongan utawa pasar Glondongan ya iku pasar kang kalebu ing wewengkon Kecamatan Palakarta Kabupatèn Sukaharja. Pasar iki kanggo adol tinuku janganan, woh-wohan, asil tetanèn, lan manéka jajanan. Pasar iki manggon ing kidulé kali Samin lan kuloné alas karèt Palakarta. Papan iki bukak sakwisé subuh nganti jam 10 ésuk. Menawa wayah wengi, pasar Glondhongan kanggo adol olah-olahan arupa panganan kaya ta bubur kacang ijo, wédhang rondhé, bakso, mi ayam, roti bakar lan sak panunggalané. Pasar iki ora gedhé kaya pasar Bekonang sanadyan amung 5 kilomèter adohé.

Asal-usul

Nalika Walanda isih ana ing Indonésia, ing tlatah Palakarta ditanduri wit karèt. Wit karèt iki kanggo nyukupi indhustri ban, setip, sol sepatu  lan liya-liyené. Sansaya suwé, wit karèt sansaya gedhé lan prodhuksi tlutuh karèt iki malah sethithik. Pawongan buruh banjur ngethok wit karèt lan nanduri lemah iku nganggo wit sing anyar supaya prodhuksi karèt tetep lestari. Kayu saka wit karèt iku banjur didèlèhaké ing kidul kali Samin. Amarga akèhè kayu gedhé iki, tlatah iki dijenengaké Glondhongan. Sansaya suwé, pawongan wayah esuk pada adol tinuku janganan, asil panén lan maneka werna. Saka prastawa iku, diwangun pasar Glondhongan kang isih nganti sepréné.