Leif Ericsson

Saka Wikipédia, Bauwarna Mardika abasa Jawa / Saking Wikipédia, Bauwarna Mardika abasa Jawi
Langsung menyang: pandhu arah, pados

Leif Eriksson (basa Islandia kina: Leifr Eiríksson) punika satunggiling panjlajah, putra Erik Sang Abrit (Eiríkr rauði). Ibunipun inggih Þjoðhildr. Bapanipun ingkang miwiti kalih koloni Norwegia, Pakuwon Kulon saha Pakuwon Wétan ing Tanah Ijem (Greenland) ingkang dipunsukani nami déning piyambakipun..

Rikala wonten ing Norwegia, Leif mlebet agami Kristen. Lajeng nalika sampun wangsul ing Tanah Ijem, tumbas praunipun Bjarni Herjólfsson kaliyan tindhak nuwèni dharatan ingkang sampun dipunpanggihi déning Bjarni.

Saga Grænlendinga (Cariyos Tanah Ijem) awuwus menawi Leif miwiti panjlajahipun saking kiwa tengenipun warsa 1000 kanggé ngrunut rute Bjarni saking arah sabalikipun. Papan pratami ingkang dipunpanggihi kebek lèmpèngan séla radin (basa Islandia: hellur). Amargi mekaten, papan punika dipunsukani nami Helluland (siti ingkang kathah séla radinipun). Mbokmenawi ingkang dipunmaksud inggih tlatah ingkang dipunwastani Kapuloan Baffin samangké.

Salajengipun, piyambakipun mamanggihi dharatan ingkang radin saha kathah kajengipun (kayu), mawi panté pasisir awedhi pethak ingkang dipunwastani Markland (siti kajeng). Wonten kamungkinan ingkang dipunkarepaken Labrador. Rikala apapanggih dharatan malih, Leif saha awakipun ndharat kaliyan mbangun pinten-pinten griya. Sedaya remen dharatan punika: awit kathah ulam salmon ing lèpèn-lèpèn. Lajeng hawanipun eca, ing musim asrep mboten patiya asrep lajeng ing musim panas mboten patiya bentèr. Ing musim asrep sesuketan ugi taksih ijem-ijem. Sedaya lajeng manggèn wonten riku sadanguning musim asrep. Cariyos ingkang sami ugi nyebat satunggiling awak baita anami Tyrkir, mbokmenawi tiyang Jerman, ingkang manggihaken anggur. Leif lajeng nyukani nami siti punika Vínland, ingkang tegesipun ‘Siti Anggur’. Rikala wangsul, Leif nulungi satunggiling tiyang Norwegia, dados piyambakipun dipunwastani 'Leif ingkang Mujur' (basa Norwegia Kina: "Leifr hinn heppni").

Leif gadhah sedhèrèk jaler kalih Þorvaldur kaliyan Þorsteinn, saha èstri satunggil, Freydís. Leif émah-émah kaliyan Þórgunna, lajeng dipunparingi putra setunggal, Þorkell Leifsson.

Pranala jawi[sunting | sunting sumber]

Commons-logo.svg
Wikimedia Commons gadhah galeri bab:
Wikipedia
Artikel punika, artikel dhasar ingkang kedah dipundarbèni sadaya basa.

Sumber artikel punika saking kaca situs web: "http://jv.wikipedia.org/w/index.php?title=Leif_Ericsson&oldid=803666"