Naraguna:Jaman Semana

Wonten ing pagelaran ringgit purwa, dhalang anggadhahi trap-trapan ingkang wigati amargi jejer minangka punjering pagelaran. Wiwit njlentrehaken lampahan, nggesangaken utawi nglampahaken ringgit (wayang), netepaken gendhing ngantos ngedum wekdal ingkang tundhonipun saged jumbuh ingng antawisipun lampahan, gendhinng lan wekdalipun. Dhalang kapendhet saking jarwadasa ngudhal piwulang ingkang tegesipun mbabar ngelmu lan pangertosan. Awit saking punika, dhalang mboten namung kaangkah saged atur panglipur ingkang arupi tontonan ananging ugi kedah saged paring tuntunan ingkang wujudipun piwulang Peprincening pagelaran ringgit purwa kaperang dados kalih bab. Ingkang satunggal bab, ngengingi piranti. Ingkang satunggal bab malih, ngengingi paraga. Piranti pagelaran ringgit purwa ing antawisipun gangsa (gamelan) jangkep slendro pelog, kothak wayang jangkep sak cempala lan keprakipun, wayang ingkang badhe dipun lampahaken, kelir utawi layar (wonten sawetawis ingkang nyebat geber), blencong, debog kangge nancepaken wayang, wayang ingkang kengge simpingan, lan sapanunggalanipun. Dene Paraga pagelaran ringgit purwa ing antawisipun,dhalang, waranggana utawi swarawati (jamak sinebat sindhen), wiraswara (bhs indonesia : paduan suara) utawi limrah sinebat penggerong, peniti, wirapradangga (limrah sinebat niyaga - musisi) lan -temtu kemawion- pamriksa utawi penonton.