Kèju Emmental

Saka Wikipédia, Bauwarna Mardika abasa Jawa / Saking Wikipédia, Bauwarna Mardika abasa Jawi
Langsung menyang: pandhu arah, pados

Cithakan:Infobox Cheese

Kèju Emmental

Emmental, Emmentaler, Emmenthal, utawi Emmenthaler inggih menika kèju saking Swiss ingkang dipundamel saking susu sapi mentah gadhah kathah bolongan utawi mata mawi ukuran ingkang ageng. [1] Keju menika kondhang minangka "keju Swiss" ing Amerika Utara sanajan kèju Swiss boten tansah tumuju ing Emmental.[2] Tiruan kèju Emmental ing Norwegia kondhang kanthi namanama Jarlsberg.[1] Kèju menika pikantuk namanipun saking dhaérah asalipun inggih menika lembah Emme ing Canton Bern lan sampun pikantuk sertifikasi saking AOC (Appellation d'Origine Contrôlée). [3] Sertifikasi AOC damel namung kèju ingkang dipunproduksi ing Emmental kemawon ingkang saged dipunparingi label "Emmentaler Swiss".[3] Ananging nama "kèju Emmental" boten dipunjagi saéngga kathah ingkang niru ing manéka negara.

Sajarah[sunting | sunting sumber]

Kèju Emmental menika sampun dipunproduksi saking taun 1293.[4] Wiwitanipun keju menika dipundamel ing mangsa panas ing dhaérah pagunungan déning para peternak.[5] Para peternak kasebut produksi kèju Emmental kanthi gunggung ingkang alit kanggé dipundhahar déning kulawarganipun lan kanggé mbayar tuan tanah.[5] Keju Emmental kapisan dipunsebataken wonten ing taun 1542.[4]Kala menika keju kasebut dipunparingaken marang penduduk Langenthal minangka kompensasi amargi musibah kobongan ingkang kalampahan. [4] Pabrik-pabrik kèju wiwit wonten kapisan ing lembah Emme nalika taun 1815 lan saking kala menika area produksi kèju menika wiwit mekar.

Wujud lan tèkstur[sunting | sunting sumber]

Wujud saking kèju Emmental menika bunder mawi diamèter 76 dumugi 94 centimeter lan dhuwur antawisipun 18 dumugi 25 sentimèter. Déné bobot kèju menika antawisipun 60 dumugi 130 kilogram. [4] Werna saking kèju menika krem pucet uatwi kuning, déné kulitipun mawi werna coklat radi kuning. Kèju menika kondhang gadhah bolongan ingkang ageng lan kathah. Amargi sipatipun ingkang gampil lèlèh, kèju Emmental asring dipunginakaken kanggé roti lapis bakar, fondue, quiche lan burger kèju.[3]

Proses anggènipun damel[sunting | sunting sumber]

Anggènipun damel kèju Emmental menika mirip kalihan kèju Gruyère.[6] Kèju Emmental dipundamel mawi ngginakaken susu mentah saking sapi ingkang dipakan damen. Susu kasebut dipunkenthelaken mawi bakteri lajeng dipuncithak.[1] [3]Keju ingkang sampun dipuncithak dipunwalik kanggé penggaringan lajeng dipunkom wonten ing toya asin lan dipunmatengaken wonten ing gua.[1] Pematengan dipunlampahi wonten ing papan ingkang adhem kanthi dangu kalih minggu.[1] Lajeng kèju-kèju dipunpindhah dhateng ruangan ingkang langkung anget antawisipun 6 dumugi 8 minggu supados wonten prosès fermentasi.[1] [6] Nalika proses fermentasi, kèju-kèju ngasilaken karbondioksida ingkang boten saged medal amargi kulit kèju ingkang kandhel.[1] [3] Gas karbondioksida kasebut lajeng damel bolongan ing kèju Emmental.[1] [3]

Pirsani ugi[sunting | sunting sumber]

Cathetan suku[sunting | sunting sumber]

  1. ^ a b c d e f g h (en) What is Emmentaler?, Wise Geek.
  2. ^ (en) Swiss Cheese, Recipezaar.
  3. ^ a b c d e f (en) What is Emmental Cheese?, Wise Geek.
  4. ^ a b c d (en) Harbutt, Juliet (2006). The World Encyclopedia of Cheese. Anness Publishing Ltd. ISBN 978-1-84309-960-4. Page 103.
  5. ^ a b (en) Emmentaler, History, Emmentaler.ch.
  6. ^ a b (en) Davidson, Alan (2006). The Oxford Companion to Food. Oxford University Press. ISBN 978-0-19-280681-9. Page 273.
Sumber artikel punika saking kaca situs web: "http://jv.wikipedia.org/w/index.php?title=Kèju_Emmental&oldid=882323"