Griya Budaya Kratonan
Griya Budaya Kratonan inggih menika papan kréatif ing Surakarta ingkang mewahi fasilitas umum, arupa panindakan édukasi budaya. Wonten kathah panindakan ingkang kalampahan wonten ing Griya Budaya Kratonan, kados ta anggegulang beksa, anggegulang gangsa, anggegulang basa Jawa, anggegulang basa Inggris, saha parembugan-parembugan budaya miturut saking buku utawi film. Griya Budaya Kratonan mapan wonten ing Margi Manduro Angka 6, Gang Kartotiyasan, Dhusun Kratonan, Kecamatan Serengan, Kutha Surakarta, Jawa Tengah.[1]
Kajawi dipun-ginakaken minangka papan kréatif, Griya Budaya Kratonan ugi dipunséwakaken kanggé kathah adicara, wonten kafé ingkang nyawisaken dhedhaharan saha unjukan, ngantos iringan tembang gendhing saben dinten Soma dalu. Kathah informasi babagan sujarah Kutha Surakarta saha Indhonésia ingkang wonten ing saben ruangan. Boten sekedhik ugi karya seni budaya ingkang katampilaken kanthi éndah wonten ing ngriki. Nalika kathah adicara ingkang kagelar, Griya Budaya Kratonan katingal dados langkung meriah.[2][3]
Palampahan[besut | besut sumber]
Wiwitanipun, wewangunan menika gadhahipun mantan Menteri Sosial Indonesia Kabinèt Djuanda, Muljadi Djojomartono. Amargi papanipun boten dipunenggéni, wewangunan menika dados boten kalestantunaken. Kathah bagéan wewangunan ingkang risak kados ta payon saha aling-alingipun. Lajeng piyambakipun paring wewangunan kasebut dhateng mantan Ketua DPR RI Akbar Tanjung, Krisnina Maharani. Ibu Krisnina lajeng ngrénovasi wewangunan kasebut nanging tetep nglestantunaken rupinipun ingkang asli. Ekstèrior saha interior wewangunan dipuncocogaken supados tetep otèntik, nglestantunaken budaya Jawa.[3]
Ruangan wonten ing lebeting wewangunan arupa joglo menika dipunbagé dados 6 ruang pamèr. Kathah bagéan wigatos ingkang kadamel saéngga kadadosan satunggal jujugan pariwisata ingkang nepangaken sujarah Kutha Sala/Surakarta. Griya Budaya Kratonan ingkang ugi kawastanan Galeri Sejarah Surakarta menika karesmèkaken wonten ing tanggal 11 Maret 2016 kapungkur, kanthi adicara ingkang karingkes kanthi panyetèlan film dokumènter saha panggung seni budaya. Kutha Surakarta samenika sampun resmi gadhah jujugan wisata sujarah kanggé nyinau mangsa rumiyinipun.[3]
Nalika karesmèkaken, Griya Budaya Kratonan kaseksèn déning Akbar Tandjung, Walikutha Surakarta Rudi Hadyatmo, sarta swargi ibunipun Presiden RI Joko Widodo, Sudjiatmo Notomiharjo. Wonten kathah ruang ing wewangunan menika ingkang paring édukasi sujarah saking ingkang komplèks dhateng ingkang spèsifik. Wonten sujarah révolusi industri ngantos wontenipun kolonialisme ing Indhonésia, kalajengaken sujarahipun Kutha Surakarta, ugi wonten kathah malih informasi ingkang saged katingal wonten ing Griya Budaya Kratonan.[4]
Jujugan[besut | besut sumber]
Menawi badhe dhateng wonten Griya Budaya Kratonan, wisatawan saged mlampah liwat Margi Gatot Subroto wonten ing Solo. Nalika liwat saking Papa Ron's Pizza, wisatawan saged ngener dhateng sisih kidul kirang langkung tebihipun 250 mèter. Wisatawan mangkih badhé kepanggih gang kaping setunggal ingkang wonten ing sisih tengenipun utawi saged pados blabag asma wandé 'Es Ndelik'. Menawi sampun kepanggih saged mlebet wonten gang kasebut. Mlampah ngantos kirang langkung 250 mèter lajeng wisatawan badhé kepanggih Griya Budaya Kratonan wonten ing sisih tengenipun. Menawi badhé mlebet kedah mbayar tikèt gunggungipun 25.000 rupiyah.[5]
Rujukan[besut | besut sumber]
- ↑ Primasasti, Agnia (2022-11-10). "Wisata Bersejarah ke Rumah Budaya Keraton". Surakarta.go.id. Dibukak ing 2023-10-14.
- ↑ "Rumah Budaya Kratonan". Tribunnewswiki.com (ing basa Indonesia). Dibukak ing 2023-10-14.
- ↑ a b c Hasan (2022-11-28). "5 Spot Anti Bosan Belajar Sejarah dan Budaya di Rumah Budaya Kratonan Solo - Pigiblog". blog.pigijo.com (ing basa Indonesia). Dibukak ing 2023-10-14.
- ↑ "Rumah Budaya Kratonan Jadi Ruang Edukasi Sejarah Kota Surakarta - Semua Halaman - National Geographic". nationalgeographic.grid.id (ing basa Indonesia). Dibukak ing 2023-10-14.
- ↑ "Rumah Budaya Kratonan di Solo : Berikut Rute dan Tiket Masuk Wisata Sejarah Tersebut". TribunSolo Travel (ing basa Indonesia). Dibukak ing 2023-10-14.