Wikipédia:Artikel pilihan/2013 06
Bordeaux (pocaping cara Prancis: [bɔʁ.do]) inggih menika salah satunggalipun kitha ingkang wonten ing Prancis. Bordeaux dipunsebat kitha plabuhan ingkang mapan ing kidul-kilèn Prancis. Bordeaux menika ibukuthanipun wewengkon administratif Aquitaine, lan mlebet Dhépartemèn Gironde. Kitha Bordeaux dados kitha paling ageng urutan kaping gangsal ing Prancis, sasampunipun Paris, Lyon, Marseille lan Lille. Taun 2007 kitha Bordeaux dipunresmèkaken minangka situs warisan donya UNESCO.
Bordeaux misuwur minangka Kitha Anggur. Bordeaux sampun mrodhuksi anggur awit abad ka-8. Kitha menika dados panyelenggara adicara pamèran indhustri anggur Vinexpo. Bordeaux ugi dados kitha kanggé panalitèn babagan militèr.
Bordeaux kalebet punjering sajarah negara Prancis ingkang gadhah manéka warni wangunan kanthi arsitèktur ingkang saé, dipundamel ing jaman kapengker, ingkang ngantos kawitanipun abad kalih dasa taksih dipunjagi. Sasampunipun wangunan kitha Paris, wangunan ing kitha Bordeaux menika wangunan ingkang dipunreksa déning pamaréntah Prancis. Bordeaux dipunakeni nggadhahi jasa minangka punjering sajarah Prancis awit abad kalih welas.
Bordeaux menika satunggaling kitha ingkang wonten ing Dhépartemèn Girondé (wewengkon Aquitaine). Tiyang ingkang pidalem ing Bordeaux dipunsebat Bordelais lan gunggungipun padunung ing sénsus taun 1999 watawis 215.363. Wewengkon menika nggadhahi wiyar 49,5 km ² kanthi kepadhetan 4 921,9 jiwa/km² lan wonten ing kainggilan 16 mèter.
Bordeaux menika dumunung ing sacaketipun Samudra Atlantika, ing kidul-kilèn Prancis. Iklim Bordeaux sedhengan kanthi mangsa asrep ingkang langkung cepet lan kalembaban ingkang inggil amargi caket kaliyan Samudra Atlantika. Ing Kitha Bordeaux wit anggur saged tuwuh kanthi subur. Kebon-kebon kanggé nanem anggur manggèn 80 kilomèter tebihipun saking punjeripun kitha Bordeaux.