Wikipedia:Artikel pilihan/2013 03

Saka Wikipédia Jawa, bauwarna mardika basa Jawa
Loncat ke navigasi Loncat ke pencarian
Gambaran umum Tata Surya (Ukuran planèt digambaraké selaras skala, sauntara leté ora): Srengéngé, Merkurius, Venus, Bumi, Mars, Ceres, Yupiter, Saturnus, Uranus, Neptunus, Pluto, Haumea, Makemake lan Eris.

Tata Surya ana ing galaksi Bima Sakti iku kumpulan benda langit sing kapérang saka sawijining lintang sing diarani Srengéngé lan kabèh objèk sing kaiket déning gaya gravitasiné. Objèk-objèk kasebut kalebu wolu planèt sing wis dikawruhi kanthi orbit awangun elips, lima planèt cilik, 173 satelit alami sing wis diidhèntifikasi, lan mayuta-yuta benda langit (meteor, asteroid, komet) liyané.

Tata Surya kapérang dadi Srengéngé, papat planèt bagéan njero, sabuk asteroid, papat planèt bagéan njaba, lan ing bagéan paling njaba yaiku Sabuk Kuiper lan piringan kasebar. Awan Oort diprakirakaké ana ing dhaérah paling adoh sing leté watara kaping sèwu ing njaba bagéan sing paling njaba.

Adhedhasar leté saka Srengéngé, kawolu planèt Tata Surya yaiku Merkurius utawa Soma (57,9 yuta km), Venus utawa Anggara (108 yuta km), Bumi (150 yuta km), Mars utawa Buda (228 yuta km), Yupiter utawa Wrehaspati (779 yuta km), Saturnus utawa Sukra (1.430 yuta km), Uranus Saniscara (2.880 yuta km), lan Neptunus (4.500 yuta km). Wiwit patengahan 2008, ana lima objèk angkasa sing diklasifikasikaké minangka planèt cilik. Orbit planèt-planèt cilik, kejaba Ceres, ana luwih adoh saka Neptunus. Kalima planèt cilik kasebut yaiku Ceres (415 yuta km. ing sabuk asteroid; biyèné diklasifikasikaké minangka planèt kalima), Pluto (5.906 yuta km.; biyèné diklasifikasikaké minangka planèt kasanga), Haumea (6.450 yuta km), Makemake (6.850 yuta km), lan Eris (10.100 yuta km).

Enem saka kawolu planèt lan telu saka kalima planèt cilik iku dikupengi déning satelit alami. Saben planèt bagéan njaba dikupengi déning cincin planèt sing kapérang saka lebu lan partikel liya.

Maca sabanjuré ...