Wikipédia:Artikel pilihan/2012 09
Slumdog Millionaire (basa Inggris "Yutawan Asu Kampung Kumuh") iku sawijining film Britania Raya taun 2008 sing disutradarani déning Danny Boyle, mawa asistèn sutradara Loveleen Tandan, lan ditulis déning Simon Beaufoy. Film iki adhedhasar gubahan saka buku roman Q and A (2005) sing ditulis déning Vikas Swarup, sawijining panulis lan diplomat India. Bukuné menang bebungah Boeke Prize lan Commonwealth Writers.
Syuting film iki dianakaké ing India. Crita film iki ngenani sawijining wong mlarat ajeneng Jamal Malik sing mélu kuis kondhang Who Wants To Be A Millionaire ing India. Nanging amarga dhèwèké bisa mangsuli kabèh pitakonan, Jamal dicekel pulisi lan diinterogasi mawa disiksa, sebab wong ora percaya yèn ana wong mlarat, bocah dalanan kok bisa pinter banget. Film iki diwiwiti kanthi adhegan nalika inspèktur pulisi (Irrfan Khan) ing Mumbai, India lagi interogasi lan nyiksa Jamal Malik (Dev Patel), tilas bocah gelandhangan saka kampung kumuh Dharavi. Jamal iku sawijining kontèstan ing acara télévisi Who Wants to be a Millionaire vèrsi India kanthi panatacara Prem Kumar (Anil Kapoor).
Jamal wis tekan pitakonan pungkasan, sing dijadwalaké kanggo sésuk, nanging dhèwèké disalahaké pulisi dianggep culika amerga dianggep anèh yèn sawijining wong kampung bisa ndarbèni kawruh sing jembar utawa kabegjan banget, olèh pitakonan sing bisa diwangsuli kabèh. Jamal banjur crita yèn pitakonan bab bintang film Bollywood Amitabh Bachchan iku gampang banget, banjur dhèwèké ngerti pitakonan liya-liyané déning kabeneran waé, tau ngalami akèh perkara sing nggawé dhèwèké ngerti rena-rena. Banjur sawisé iku film dibanjuraké mawa adhegan-adhegan flashback sing nuduhaké pengalaman-pengalamané nalika cilik. Nalika iku Jamal lan Malik urip ing kutha Bombay/Mumbai lan sekolah. Ing sekolah diajari crita The Three Musketeers. Saliyané iku uga dituduhaké kepriyé Jamal olèh tapaktangané Amitabh Bachchan.