Walang wadhang

Saka Wikipédia Jawa, bauwarna mardika basa Jawa
Loncat ke navigasi Loncat ke pencarian
Kembang walang wadhang

Walang wadhang duwé jeneng élmiyah Dombeya diversifolia utawa Pterospermum diversifolium ya iku wit taunan saka kulawarga Malvaceae. Wit iki dhuwuré bisa nganti 30 mèter lan dhiamèter galihé 105 séntimèter. Galihé silindhris lan wernané klawu enom. Ing awak wit iki akèh ditemoni lentisel sing kasar. Godhongé werna ijo selang-seling kasusun spiral lan simétris. Godhong iki lunyu lan ngisoré werna soklat. Kembangé kasusun ana ing tandhan werna krèm. wohé kapsul lan bisa pecah nalika wis tuwa.

Biologi lan Ékologi[besut | besut sumber]

Kembang Walang wadhang diprodhuksi saben taun.[1] Tetuwuhan iki tuwuh mawa wiji.[2] Pasebaran wiji direwangi dening angin. Wit iki tuwuh kurang luwih 1000 méter ing sadhuwuring samodra lan akèh ditemoni ing alas sekundhèr. Bisa uga tuwuh ana ing lemah masir, pèrèng lan pundhung. Tetanduran iki kasebar ing Pulo Sumatera nganti Papua.

Piguna[besut | besut sumber]

Godhong Walang wadhang

Kayuné sing atos[3] dadi bisa dimupangataké dadi akèh kagunan. Kayu Walang wadhang bisa kanggo piranti wangunan, jobin, prau, mèbel, lan bidhuk. Tlutuh saka godhong iki bisa kanggo tamba gatel ana ing sikil.

Rujukan[besut | besut sumber]

  1. Partomihardjo, Tukirin dkk. (2014). Jenis-Jenis Pohon Penting di Hutan Nusakambangan. Jakarta: LIPI Pers bersama Yayasan Pustaka Obor Indonesia. k. 90. ISBN 978-979-799-804-2. 
  2. "Catalogue of life". 
  3. "Diversity of life".