Undhang-undhang Basa Wales 1993

Saka Wikipédia Jawa, bauwarna mardika basa Jawa
Loncat ke navigasi Loncat ke pencarian

Undhang-undhang Basa Wales 1993[1] iku sawijining undhang-undhang Parlemèn Britania Raya kang ngundhangaké yèn basa Wales iku padha drajadé karo basa Inggris ing séktor publik tlatah Wales

Pranata sajeroning Undhang-undhang Wales 1535–1542 nglantari basa Inggris dadi siji-sijiné basa kanggo pangadilan lan liya-liyané kang magepokan karo administrasi publik ing Wales. Undhang-undhang Pangadilan Wales[2] 1942 satemené wis wènèh wewenang kanggo migunakaké basa Wales sajeroning pangadilan jalaran panyatur basa Wales padha karo ditunakaké yèn kudu nyaturaké basa Inggris. Nanging mangkono, surasaning iki kurang dijlèntrèhaké sajeroning prakara ukum sabanjuré. Undhang-undhang Basa Wales 1967[3] banjur ngganti putusan iku lan nguri-uri manèh gagasan 'bebener sajajar' antaraning basa Wales lan basa Inggris. Wusana, dhépartemèn-dhépartemèn pamaréntah lekas nyepakaké layang-layang nganggo basa Wales, lan miwiti kampanye kanggo ngganti kabèh tetenger dalan ékabasa kang mung nganggo basa Inggris. Kampanye iki ditandangi déning anggotaning Cymdeithas yr Iaith Gymraeg (Kawula Basa Wales). Paheman panggonan (déwan lokal) dililakaké kanggo nyadhiyakaké tetenger dwibasa saakèh-akèhé ing Wales. Sanajan mangkono, nembé sajeroning Undhang-undhang Basa Wales 1993 iki ditetapaké yèn 'ngenani urusan publik lan administrasi ukum, kanthi lumrah, basa Wales lan basa Inggris kudu direngkuh dhedhasar kasajajaran.'

Undhang-undhang iki wis nggayuh telung babagan:

  • ngadegaké Paheman Basa Wales kang nanggel jawab marang Carik Nagara kanggo Wales mawa jejibahan ngundhakaké pigunaning basa Wales lan nanggol pijumbuhing tumrap katemton-katemton liya.
  • awèh wewenang marang panyatur basa Wales kanggo nyaturaké basa Wales sajeroning lakuning pangadilan.
  • nyengkuyung kabèh paguyuban ing sèktor publik kang nganakaké playanan ing Wales supaya ngrengkuh basa Wales lan basa Inggris kanthi sajajar.

Kuwasa kang dijibahaké marang Carik Nagara kanggo Wales sajeroning undhang-undhang iki sabanjuré dialihaké marang Déwan Nasional kanggo Wales. Katetepan kang dijibahaké utawa katetepan kapindho digawé dhedhasar undhang-undhang iki déning Carik Nagara, lan wusana Déwan Nasional mbutuhaké luwih akèh bebadan publik kanggo nyadhiyakaké Rékadaya Basa Wales kang ngubayani gagasan 'kasajajaran ing pangrengkuh'.

Rujukan[besut | besut sumber]

Pranala njaba[besut | besut sumber]