Umbu Landu Paranggi
Umbu Landu Paranggi inggih punika salah satunggaling sastrawan ing Indonésia ingkang miyos wonten ing Kananggar, Paberiwai, Sumba Timur, Nusa Tenggara Timur, tanggal 10 Agustus 1943.
Pendhidhikanipun[besut | besut sumber]
Umbu Landu Parangi sampun naté ngrampungaken pendhidhikan formalipun, tingkat SD lan SMP, ing laladanipun, ing Sumba. Sasampunipun lulus saking SMP, lajeng piyambakipun nerasaken sekolah ing tingkat SMA ing SMA Bopkri 1 Yogyakarta. Sabibaripun lulus SMA, Umbu Landu nerasaken kuliah wonten ing Fakultas Ilmu Sosial dan Imu Pulitik Universitas Gadjah Mada, nanging kaliyan piyambakipun dipunsengaja boten dipunrampungaken. Lan piyambakipun mutusaken kanggé kuliah wonten ing Jurusan Sosiologi Universitas Janabadra. Wiwit taun 1950-nan, Umbu sampun remen nyerat puisi saha esai. Nalika piyambkipun sekolah ing SMA Bopkri punika, karemenanipun kanggé nyerat sepisanan tuwuh lan sansaya ngrembaka.[1] Ing sekolah SMA punika ugi, Umbu manggihaken satunggaling guru ingkang paring pangaribawa ing dalan pagesanganipun. Ing saben wonten pasinaon saking guru kasebat, Umbu kanthi meneng-meneng nyerat puisi. Wiwit wekdal punika Umbu sregep nyerat puisi ingkang salajengipun puisi-puisinipun kapacak wonten ing sadhengah koran.[2]
Padamelan lan Organisasi[besut | besut sumber]
Ing taun 1968, ing Yogyakarta, Umbu Landu sesarengan kaliyan penyair sanèsipun kados ta Suwarna Pragolapati, Imam Budi Santosa, saha Teguh Ranusastra Asmara ngedekaken lan dados pengasuh golongan Persada Studi Klub (PSK). Saking komunitas sastra punika ingkang salajengipun ngalairaken kathah sastrawan ageng, kados ta Emha Ainun Nadjib, Korrie Layun Rampan, Linus Suryadi AG, Yudistira Adi Nugraha, lan sanès-sanèsipun. umbu ugi sampun naté dados redaktur kabudayan Pelopor Yogya ing taun 1966-1975. Umbu asring dipunsebat dados Présidhèn Malioboro. Umbu ingkang sapunika dumunung ing Bali wiwit taun 1979 punika lajeng ugi dados redaktur harian Bali Post, ing Denpasar, Bali. Ing Bali, ing jaman wekdal taun 1980-nan saha taun 1990-nan, Umbu merang puisi-puisi ingkang saged kapacak wonten ing ruang sastra dados sekawan kelas, inggih punika: kelas "Pawa" kanggé para mudha ingkang nembé gladhi nyerat puisi, kelas "Kompetisi" inggih kanggé para pujangga ingkang sampun sregep lan kanthi tumemen asring ngirim puisi ing gawangipun lan karyanipun sampun siyap dipunadu kaliyan pujangga sanèsipun ing kelasipun, kelas "Kompro" utawi "Kompetisi promosi" inggih kanggé para pujangga ingkang sampun lolos saking kathah babak kompetisi lan sampun siyap dipuntandhingaken kaliyan pujangga sanèsipun ing njawi kandhangipun, lan kelas "Posbua" utawi "Pos Budaya" kanggé para pujangga ingkang dipunanggep sampun ahli kanggé damel puisi katitik saking basa seratanipun ingkang sampun tingkat inggil.
Asiling karya[besut | besut sumber]
Sajak-sajakipun sampun naté kapadak wonten ing Mimbar Indonesia, Gadjah Mada, Basis, Gema Mahasiswa, Mahasiswa Indonesia, Pelopor Jogja, Angkatan Bersenjata, lan Horison. Kajawi punika, karyanipun ugi sampun kapacak wonten ing buku kempalan puisi sesarengan kados ta "Tonggak" ingkang dados editor inggih punika Linus Suryadi AG, "Bonsai's Morning", saha "Teh Ginseng".
Cathetan suku[besut | besut sumber]
- ↑ [1] Archived 2016-03-06 at the Wayback Machine. Umbu Landu Paranggi 2 (dipunundhuh tanggal 26 Januari 2013)
- ↑ [2] Archived 2013-01-14 at the Wayback Machine. Penyair: Umbu Landu Paranggi (dipunundhuh tanggal 26 Januari 2013)