Transportasi ril ing Swiss

Saka Wikipédia, Bauwarna Mardika abasa Jawa / Saking Wikipédia, Bauwarna Mardika abasa Jawi
Jujug: pandhu arah, pados
Peta jaringan sepur ing Swiss

Transportasi ril ing Swiss iku kerep diarani minangka salah sawijining sistém transportasi ril sing éfisièn dhéwé saindhenging donya. Sistém pasepuran ing Swiss kabangun saka jaringan utama darbèné nagara lan jaringan liyané darbèné maskapé-maskapé swasta ing dhaérah operasi mawa latar wuri alam sing béda-béda. Banjur salah sawijining ciri khas utama sepur ing Swiss iku bangunan-bangunan lan konstruksi-konstruksi sing ngédab-édabi, utamané trowongan-trowongan dawa lan trayèk-trayèk sing astamiwa.

Maskapé nagara lan swasta loro-loroné nrapaké lokomotif listrik lan diesel. Ing sawetara trayèk uga isih ana sepur kluthuk utawa sepur kukus. Jawatan sepur Swiss ndarbèni jeneng SBB-CFF-FFS. Iki cekakan saka SBB = Schweizerische Bundesbahnen ing basa Jerman, CFF = Chemins de Fer Fédéraux Suisses ing basa Prancis lan FFS = Ferrovie Federali Svizzere ing basa Italia. Ing basa Jawa pertalané 'Jawatan Sepur Fédéral Swiss'. Jawatan Sepur Swiss ndarbèni telung jeneng ing telung basa amarga Swiss ndarbèni telung basa resmi.

Sajarah[sunting | besut sumber]

Trayèk sepur kapisan dibukak ing taun 1848 antara Zürich lan Basel. Ing taun 1848 pamaréntah Swiss njaluk tulung marang insinyur kawentar Britania Robert Stephenson kanggo ngrancang karangka jaringan sepur nasional. Stephenson banjur ngrancang trayèk saka Zürich menyang Jenéwa via Lausanne. Trayèk iki nganti saiki isih dadi jaringan utama SBB.

Dideleng saka lokasi Swiss, mula ora nggumunaké manawa wiwit awal Swiss kepéngin nyambungaké jaringan sepuré marang jaringan sepur nagara-nagara jiran. Dadi Swiss kudu bisa golèk cara supaya bisa nembus Pagunungan Alpen. Solusi kapisan iku trayèk menyang Italia ngliwati Trowongan Gotthard.

Jaringan sepur ing Swiss[sunting | besut sumber]

Jaringan ril sepur Swiss dawané 4.876 km (ing taun 2010). Ing sawijining nagara sing ambané 41.285 km2, iku bebarengan karo Céko kalebu sing padhet dhéwé sadonya manawa nagara mini kaya Monako lan Vatikan ora mèlu diétung. Namung sawetara kilomèter waé sing ora dièlèktrifikasi.

Kalebu jaringan iki saliyané Jawatan Sepur Swiss uga kabèh sepur gunung lan trèm-trèm sing ana ing kana. Jaringan ril iki kapérang dadi jaringan utama lan jaringan sampingan (alternatif). Sing kalebu jaringan utama iku kabèh jalur ril biasa (1435 mm) ing dalan-dalan utama. Jalur-jalur trèm iku kalebu jalur biasa lan jalur ciyut.

42 km saka jaringan iki darbèné DB (Jawatan Sepur Jerman) sing dunungé ana ing wewengkon Swiss. Saliyané iku ÖBB (Jawata Sepur Austria) uga ndarbèni 2 km ril. Kosok baliné SBB uga ndarbèni 14 km ril ing nagara-nagara tetangga.

Pranala njaba[sunting | besut sumber]

Cithakan:Wikipedia books