Sidhat jepang

Saka Wikipédia Jawa, bauwarna mardika basa Jawa
Loncat ke navigasi Loncat ke pencarian
Sidhat jepang
Anguilla japonica.jpg
Klasifikasi ngèlmiah
Karajan: Animalia
Filum: Chordata
Klas: Actinopterygii
Ordho: Anguilliformes
Famili: Anguillidae
Génus: Anguilla
Spésies: A. japonica
Jeneng binomial
Anguilla japonica
Temminck & Schlegel, 1846

Sidhat jepang (Anguilla japonica) inggih punika jinising sidhat saking familia Anguillidae [1] ingkang kapanggihaken wonten ing Jepang, Koréa, Vietnam, Laut Cina Wétan lan Filipina lèr. Kados sidhat sanèsipun, sidhat Jepang punika ulam katadromus ingkang nelasaken sapérangan gesangipun wonten ing toya ingkang tawar lan toya segara. Ekologi sidhat spésies punika taksih dèrèng dipunmangertosi kanthi cetha. Dumugi ing taun 2006, papan kanggé ngendog sidhat jinis punika babar blas boten dipunmangertosi.

Dèskripsi[besut | besut sumber]

Ukuran dawanipun ulam ingkang ageng punika antawisipun 1 m dumugi 1,3 m. Wujudipun awak gilig ndawa lan langsing. Déné werninipun awak punika klawu wonten ing pérangan punggung, nanging wonten ing pérangan weteng mawi warni putih. Sirahipun ulam punika pucukipun bunder kanthi mata bunder lan lambé ingkang ageng. Sidhat punika boten gadhah sirip weteng nanging gadhah sirip punggung lan sirip anal ingkang sinambungan kaliyan sirip buntut. Kulitipun lunyu amargi gadhah selapu lendir, nanging ugi gadhah sisih wonten ing sangandhaping kulit. Sisikipun alit sanget lan namung dipuntingali mawi mikroskop. Sidhat Jepang punika gadhah sisik paling alit ing donya. Werninipun awak sidhat ingkang alasan wonten ing pérangan punggung klawu campur kaliyan werni biru radi ijo lan sapérangan gadhah werni kuning wonten ing pérangan weteng. Ulam wadon nalika masa ngendog nedahaken werni pembiakan, pérangan punggung éwah dados werni ireng, pérangan weteng dados putih pérak , déné sirip dhadha tambah ageng.

Habitat[besut | besut sumber]

Populasi sidhat jepang lan belut toya tawar sanèsipun wonten ing donya punika mandhap sanget. Mandhaping populasi punika miturut prakiraan amargi éwah-éwahaning kawontenan toya ingkang ngganggu wangsulipun larva sidhat ingkang dipunwastani leptocephali dhateng lèpèn-lèpèn. Tim panaliti Universitas Tokyo nalika taun 2006 saged kasil manggihaken papan ngendog sidhat Jepang. Adhedhasar spésimèn pra-leptocephali ingkang nembé netes, umur 2 dumgi 5 dinten lan kaidentifikasi kanthi genetik, papan ngendoh sidhat Jepang punika wonten in gunung ing dhasaring segara Suruga sisih kilèn Kepuloan Mariana (14–17° N, 142–143° E). Wonten ing papan ingkang sami, sidhat Jepang kasil dipuncekel nalika taun 2008 déning ilmuwan saking Dinas Riset Perikanan Jepang.[2]

Sidhat ingkang sampun ageng migrasi èwunan kilomèter saking lèpèn-lèpèn ing Asia Wéetan dhateng papan ngendog kanthi kawontenan ingkang luwé.[3] Leptocephali netes ing segara lajung kabeta déning Arus Kuroshio mangaler dhateng habitat toya tawar ing Asia Wétan papan kanggé mangsa plankton. Nalika sampun ageng lajeng mlebet ing lèpèn-lèpèn lan lelampahan dhateng hulu sarta dados ageng malih ing mriku. Sidhat Jepang dipunmangertosi asring medal saking toya nalika wanci dalu lan melata ing dharat. Pakan kanggé sidhat Jepang inggih punika urang, gegremet, lan ulam ingkang alit.[4]

Mupangat[besut | besut sumber]

Wonten ing Basa Jepang, sidhat Jepang punika dipunwastani unagi [5] lan dipundhahar bibar dipunpanggang kanthi cara kabayaki. Unagi kabayaki dipunsajèkaken minangka unadon lan ugi minangka neta kanggé sushi.

Cathetan suku[besut | besut sumber]

  1. Anguilla sp., (dipunakses tanggal 11 Maret 2013)
  2. Chow, S.; Kurogi, Hiroaki; Mochioka, Noritaka; Kaji, Shunji; Okazaki, Makoto; Tsukamoto, Katsumi (2009), "Discovery of mature freshwater eels in the open ocean", Fisheries Science 75: 257–259, doi:10.1007/s12562-008-0017-5 
  3. Chow, S.; Kurogi, H; Katayama, S; Ambe, D; Okazaki, M; Watanabe, T; Ichikawa, T; Kodama, M; Aoyama, J (2010), "Japanese eel Anguilla japonica do not assimilate nutrition during the oceanic spawning migration: evidence from stable isotope analysis", Marine Ecology Progress Series 402: 233–238, doi:10.3354/meps08448 
  4. Man, S.H.; Hodgkiss, I.J. (1981), Hong Kong freshwater fishes, Hong Kong: Urban Council, Wishing Printing Company, k. 75 
  5. Ikan Sidat Indonesia Diincar Jepang , (dipunakses tanggal 11 Maret 2013)

Pranala njawi[besut | besut sumber]