Sang Hyang Anantaboga
Sang Hyang Anantaboga (Antaboga) iku putrane Sang Hyang Anantanaga lan Dewi Wasu. Wujude Sang Hyang Anantaboga, ula gedhe (naga). Tembung Ananta mengku teges tanpa wates, boga tegese pangan. Anantaboga mengku teges mangane ora winates. Kahyangane ing Saptapratala (Saptabumi), yaiku bumi sap (lapis) 7. Dadi papane ing bumi ngisor dewe.
Garwane Sang Hyang Antaboga asmane Dewi Supreti , peputra loro, yaiku Dewi Nagagini lan Bambang Nagatatmala.
Sang Hyang Anantaboga digdaya banget. Darbe upas Anta, upas Warayang, lan upas Penganten. Sing sapa disembur nganggo upase, mesthi lebur papan tanpa dadi. Sedheng didilat tipak sikile wae, manungsa bisa mati. Kajaba iku, Sang Hyang Anantaboga darbe aji kemayan, sing dayane lamun winateg, Sang Hyang Anantaboga bisa malih wujud manungsa.
Senadyan wujude naga, Sang Hyang Anantaboga iku jangkeping dewa. Kewajibane nyangga bumi. Jaman biyen yen ana lindhu sok digathuk-gathukake karo pakaryane Sang Hyang Anantaboga. Jarene Sang Hyang Anantaboga ngulet utawa ngobahake awake. Kamangka sing dikarepake nyangga bumi iku, njaga karahayoning bumi (lestarine alam) supaya aja nganti dirusak dening sapa wae. Amarga yen nganti alame rusak (bumine rusak), bisa nuwuhake karusakan gedhe. Bisa njalari banjir lan lemah longsor.
Sang Hyang Anantaboga nate mbangunake tapa. Dumadakan tutuke kang anjeber klebon Cupu Linggamanik. Sanalika udhar tapane. Pandugane, iku kanugrahan kang ditampa, awit katarimaning tapa. Ora let suwe katungka praptane para dewa kang mbujung tibaning cupu. Rehne dijaluk ora diulungake, wusana dadi perang rame ing dhasaring bumi. Sang Hyang Anantaboga dikrubut para dewa.
Supaya aja nganti ana kurban, Sang Hyang Anantaboga trima ngoncati. Sigra ngetog karosan, njebol saka dhasaring bumi, sowan ing ngarsane Bathara Guru. Cupu Linggamanik diaturake Bathara Guru. Bareng cupu iku dibukak, cahyaning Retna Dumilah temah dadi wanodya endahing warni tur isih rumaja putri. Dening Bathara Guru kaparingan asma Dewi Sri Tiknawati.
Ing lakon Bale Sigala-gala, Dèwi Kunthi lan para putrane (Pandhawa) bisa slamet saka kobaring dahana amarga mlebu ing urung-urung gaweyane Kanana, lan dumadakan ana garangan putih mawa cahya kang nggawa Pandhawa tekan kahyangan Saptapratala. Garangan putih iku jebul saka dayane Sang Hyang Anantaboga, sing njarag nekakake Pandhawa ing kahyangane, amarga ditangisi anake wadon sing nyumpena ngladeni Raden Bratasena (panenggaking Pandhawa).
Wusana Raden Bratasena didhaupake karo Dewi Nagagini ing Kahyangan Saptapratala. Tembene Dewi Nagagini peputra Raden Antareja.
Kapethik Saking
[besut | besut sumber]- Mulyantara, sampul majalah Jaka Lodhang tokoh wayang "Sang Hyang Anantaboga"