Saloka Park

Saka Wikipédia Jawa, bauwarna mardika basa Jawa
Loncat ke navigasi Loncat ke pencarian
Saloka Theme Park
Saloka Park Logo.png
Logo Saloka Park
Dumunung ing tlatah Semarang, Jawa Tengah, Indonésia
Alamat Jl. Fatmawati No.154, Gumuksari, Lopait, Kec. Tuntang, Semarang, Jawa Tengah 50773
Situs web www.salokapark.com
Direktur PT. Panorama Indah Permai
Kabukak 22 Juni 2019
Jembar 29 acres (12 ha)

Saloka Park utawa Taman Saloka (Carakan: ꦠꦩꦤ꧀ꦱꦭꦺꦴꦏ) yaiku salah sawijining taman panglipuran tématik kang mapan ing Semarang, Jawa Tengah.[1] Jeneng Saloka dijupuk saka salah sawijining paraga ing gugon tuhon masarakat Rawa Pening. Paraga iku mau kawastanan Ki Hajar Salokantara kang nduwèni anak aran Baru Klinthing.

Prenah[besut | besut sumber]

Saloka Park kang ambané udakara 12 Héktar iki dumunung ing Lopait, Tuntang, Kabupatèn Semarang, Jawa Tengah. Papan dumunungé prenahé ana pasimpangan antarané Kutha Semarang, Salatiga, Surakarta, lan Daérah Istiméwa Yogyakarta.[2]

Sajarah yasan[besut | besut sumber]

"Loka" araning maskot Saloka Park

Saloka Theme Park nduwèni maskot aran 'Loka' kang awujud naga ijo.[3] Jeneng Saloka dijupuk saka salah sawijining paraga ing gugon tuhon masarakat Rawa Pening. Paraga iku mau kawastanan Ki Hajar Salokantara kang nduwèni anak aran Baru Klinthing. Saka legéndha iku, mula Saloka nduwèni téma kang saèmper karo gugon tuhon masarakat ing sakiwa-tengené iku mau.[1][2][4][5]

Saloka Park diyasa kalawan piranti modhéren déning para juru tenaga kang wus nduwèni pangalaman uga nduwé lisènsi internasional. Saloka dirumat déning PT. Panorama Indah Permai lan kadhaftar minangka anggotaning IAAPA  (International Association of Amusement Parks and Attractions).[1][6] Banjur Saloka Park resmi dibukak ing 22 Juni 2019 déning Mantri Pariwisata Républik Indonésia, Dr. Ir. Arief Yahya, M.Sc., lan Gubernur Jawa Tengah H. Ganjar Pranowo, S.H., M.IP..[3] Mantri Pariwisata uga ngandharaké manawa Saloka Park iku dadi salah sawijining papan dhéstinasi wisata ing laladan Joglosemar (Jogja, Solo, lan Semarang).[5]

Bukak[besut | besut sumber]

Wisata Saloka dibuka saka jam 10.00 WIB nganti 18.00 WIB. Ing dina Jumuwah buka saka jam 14.00 WIB nganti 20.00 WIB. Wondéné ing dina prèinan buka saka jam 10.00-20.00 WIB.[5] Rega tikèt nalika dina Senèn - Jumuwah yaiku Rp 120 èwu, déné ing dina Setu - Minggu utawa dina prèi yaiku Rp 150 èwu.[3][2]

Wahana[besut | besut sumber]

Laladan ing Saloka Park kadadèn saka 25 wahana kang kapérang dadi limang pérangan zona[1], ing antarané yaiku:

  • Pesisir
  • Balalantar
  • Ararya
  • Kamayayi
  • Segara Prada

Saloka Park ora mung nyawisaké wahana dolanan, nanging uga ana hiburan laser animasi Baru Klinthing. Hiburan kaya mangkéné iki dadi kang paling dhisik dhéwé lan iji-ijiné kang ana ing Indonésia.[5] Saliyané wahana dolanan lan hiburan, uga ana sawetara réstoran, café, lan foodtruck kang dodolan manéka warna panganan lan ombènan.[1]

Pesisir[besut | besut sumber]

Zona Pesisir mapan ana sisih ngarep. Rengganing laladan iki pinaès kaya déné swasana pasisir panté. Wondéné wahana kang bisa dijajal ing laladan iki ing antarané yaiku: Lumbung Ilmu Galileo, Taman Galileo, sarta réplika Kapal Jenju. Saliyané iku, uga ana papan aréna Jejogèdan kang kerep kapacak ing dina-dina tartamtu.

Lumbung Ilmu Galileo (science center) minangka punjering wahana ngèlmu kawruh kang migunani tumrap sapa waé, mligi kanggoné bocah-bocah. Nalika mlebu ing wahana iki plancong bakalé disuguhi Hall of Fame kang isiné ngajak para plancong supaya tepung marang 10 paraga saka manéka nagara.Saliyané iku, uga ana zona kawruh kang bisa ditlusur ing kéné, ing antarané yaiku: Zona Disester, Zona Prasejarah, Zona Bumi, Zona Zaman Es, Zona Flora lan Fauna, Zona Tubuh Manusia, uga Zona Antariksa. Ing wahana iki manéka warna kawruh bisa diangsu lumantar médhia gambar, vidhéo, réplika uga manéka dolanan, kaya ta kombinasi warna lan piano lanté.[6]

Ing zona iki ana wahana kondhang aran Cakrawala (ferris wheel). Wahana kang wujud kitiran raseksa warna-warni iki dhuwuré 33 mèter. Suwéné dolanan iki udakara 15 menit sak ubengan. Saka dhuwur Cakrawala iki, plancong bisa ngrasakaké sesawangan zona-zona dolanan ing Saloka Park, sesawangan Rawa Pening, sawah, lan jèjèran gunung ing Jawa Tengah.[6]

Ing zona Pesisir iki uga ana Pasar Seni Saloka kang adol manéka warna olèh-olèh utawa suvenir. Mligi kanggo para plancong kang karsa dhahar, wis cumawis manéka warna griya dhahar ing antarané yaiku: Kafe Jenju, Tuk CIO Café, dan Srengenge Café.[1]

Balalantar[besut | besut sumber]

Zona Balalantar iku nduwèni téma alas. Ing papan iki nyawisaké sawetara wahana lan atraksi kang cocog kanggo sakulawarga. Sisih ngarepé zona iki ana Resi Waringin minangka gegambaraning wit kang wicaksana. Wondéné wahana kang bisa dijajal ing laladan iki ing antarané yaiku: Angon Ingon, Kumbang Layang, Jamur Apung, Safari Bocah ('antique car'), Adu Tangkas, lan Adu Nyali ('haunted house').[1]

Angon Ingon iku papan wahana zoo utawa kebon kéwan ing Saloka Park. Kebon kéwan iki ambané 1.240 mèter pesagi. Ing wahana iki bisa bocah-bocah bisa nyinau manéka jinis manuk kaya ta blibis, jalak bali, manuk macaw, manuk sun conour, merak biru, merak putih, bèbèk mandarin, pitik golden pheasant, lan pitik lady amherts pheasant. Saliyané iku, uga ana bulus, klinci, lan sapanunggalané.[6]

Agrowisata Ijo Royo Royo yaiku wahana papan prodhuksi lan rékréasi kang ambané 5.262 mèter pesagi. Papan aréa prodhuksi minangka aréa édhukasi kanggo nepungaké manéka warna tanduran woh-wohan, kaya ta jambu, pelem, srikaya, nangka, blimbing, durèn, manggis, sawo, lan jeruk bali. Ing antarané tanduran woh-wohan iku mau, uga ana tanduran kekembangan. Ing aréa iki ana labirin taneman, 5 lumbung pari, lan réplika kandhang kebo.[6]

Kamayayi[besut | besut sumber]

Kamayayi ing Saloka Park nduwèni konsèp kanggo papan dolanan uga sinau kanggo bocah-bocah cilik. Ana 7 wahana dolanan bocah, ing antarané yaiku: Polah Bocah, Kupu-Kupu, Pinguin, Tata-Titi, Semprat-Semprot, Komidi Kuda Laut, lan Teka Teko. Saliyané wahana, ing zona iki uga ana sawenèh réstoran wujud foodtruck lan warung kang dodolan ès krim.[1]

Polah Bocah iku papan dolanan indoor ing Saloka Park mligi kanggoné bocah kang umuré 3-6 taun, nanging bocah umur 1-2 taun uga kena dolanan ing aréa iki kanthi sarat kudu diawasi wong tuwané langsung. Ing papan iki ana 15 dolanan bocah, ing antarané yaiku: Fire Station, Area Mandi Bola, Start Drawaing, Prosotan, Kapal, Puzzle, Mobil tidak bergerak, Cup Putar, Sepeda, Pohon Kelapa, Kolam, Puzzle dan Piano, Ice Cream, Trampolin, lan Mobil-Mobilan.[6]

Uga ana wahana Kupu Kupu yaiku wahana pit gantung warna-warni awujud kupu. Pit iki bisa mubeng lan mabur kanthi dhuwur maksimal 4 mèter. Nalika diobèl saya seru, mangka bakalé bisa mabur luwih dhuwur manèh. Kapasitas ing wahana iki yaiku 12 wong kalawan pit gantung cacah 6 kang wus cumawis. Dolanan iki bisa mubeng sasuwéné 2 menit.[6]

Semprat-Semprot iku wahana dolanan banyu kang dilakokaké ana sadhuwuré kursi mubeng kang bakal ngubengi patung-patung kéwan segara sasuwéné 3 menit. Ing saben patung kéwan segara iku mau ana sénsor lan para plancong kudu némbakaké semprotan nuju marang patung iku mau. Yèn anggoné némbak bisa kena sénsor iku mau, mangka kang main bakalé olèh surprize kang ngagètaké yaiku wujud balesan semprotan banyu. Wahana iki nduwèni kapasitas kanggo 24 wong, mula cocog kanggoné plancong kang anggoné wisata rombongan bareng kanca utawa kulawargané.[6]

Ararya[besut | besut sumber]

Zona iki nyawisaké manéka warna wahana tantangan, ing antarané yaiku: Paku Bumi, Bengak-Bengok, Lika-Liku, Obat Abit, lan Senggal Senggol. Saliyané iku, uga ana wahana santé kanggo ngrasepi swasana sinambi mangan manéka warna pasugatan, yaiku ing Kolam Bebek lan Rimba Café. Saèmper kaya Kamayayi, ing zona iki uga ana foodtruck kang dodolan manéka warna panganan lan ombènan.[1]

Segara Prada[besut | besut sumber]

Zona iki nduwèni téma indhustri tambang lan dadi iji-ijiné zona kang nyawisaké wahana campuran antarané wahana dolanan klawan papan kulinèr. Wahana ing papan iki yaiku Gonjang Ganjing lan Kedai Daimami.[1]

Tutup[besut | besut sumber]

Saloka Park sawetara wektu ditutup jalaran anané pageblug virus corona (Covid-19) ing Indonésia, mligi ing Kabupatèn Semarang adhedhasar Surat Edaran Dinas Pariwisata Kabupaten Semarang No.556/300/2020 tentang Antisipasi Penularan Covid-19. Manajemèn Saloka Theme Park mutusaké kanggo nutup oprasionalé kanggo sawetara wektu.[7]

Deleng uga[besut | besut sumber]

Rujukan[besut | besut sumber]

  1. a b c d e f g h i j "Tentang Saloka". Saloka Park (in Inggris). Retrieved 2020-05-19.
  2. a b c Dewi (2020-06-01). "SALOKA PARK Tiket & 7 Wahana Terseru". TravelsPromo (in Indonesia). Retrieved 2020-06-01.
  3. a b c Yunita, Niken Widya. "Tempat Wisata Saloka Theme Park, Rekreasi Kekinian di Semarang". detikTravel (in Indonesia). Retrieved 2020-06-01.
  4. Fimela.com (2020-02-17). "7 Wahana Paling Seru di Saloka Park yang Wajid Dicoba Bareng Keluarga". fimela.com (in Indonesia). Retrieved 2020-06-01.
  5. a b c d Times, I. D. N.; Kencana, Dhana. "12 Potret Saloka, Taman Rekreasi Tematik yang Penuh Wahana Seru". IDN Times (in Indonesia). Retrieved 2020-06-01.
  6. a b c d e f g h Rudi (2020-03-23). "Saloka Park Semarang, Theme Park Terbesar Di Jawa Tengah". NativeIndonesia.com (in Inggris). Retrieved 2020-06-01.
  7. "Saloka Theme Park Ditutup Sementara Karena Covid-19". www.gatra.com (in Indonesia). 2020-03-24. Retrieved 2020-06-01.