Pulo Anak Krakatau

Saka Wikipédia Jawa, bauwarna mardika basa Jawa
Pulo Anak Krakatau
Pulo Anak Krakatau
Salah satunggaling gambar pulo Anak Krakatau
Gunung Anak Krakatau

Pulo Anak Krakatau inggih punika salah satunggaling pulo ing Indonésia ingkang mapan wonten ing Selat Sunda. Pulo Anak Krakatau gadhah koordinat 6°6′0″S 105°25′0″E / 6.10000°S 105.41667°E / -6.10000; 105.41667. Pulo punika kalebet pulo vulkanik ingkang alit, ingkang tuwuh ing antawisipun Pulo Sertung (Verlaten Eiland) kaliyan Pulo Rakata Kecil (Lang Eiland) ing taun 1928 saking lebet [l[aut]] kanthi jero 27 m. Pulo punika inggih kalebet pulo ingkang paling anem ing Indonésia.

Ing taun 1929, pulo alit punika ical malih, nanging nalika taun 1930 pulo punika tuwuh malih sesarengan kaliyan njeblugipun Gunung Anak Krakatau. Salajengipun kanthi aktifipun malih Gunung Anak Krakatau ing Pebruari 1933, pulo Anak Krakatau tambah langkung ageng malih. Ing taun 1935, pulo punika wujudipun radi bunder kanthi diameter kirang langkung 1200 m, kanthi dhuwur 63 m. Ing taun 1940 dhuwuripun dados 125 m, lan ing taun 1955 dhuwuripun dados 155 m saking sandhuwuring laut. Ing taun 1959 pulo punika njeblug malih lan medalaken kebul ireng ngantos 600 m.[1] Kanthi aktifipun malih gunung api ing pulo punika, mila titik paling dhuwur ing pulo Anak Krakatau saben taun tambah dhuwuripun udakawis 7-9 mèter saben taun.

Kaanan Fisik[besut | besut sumber]

Aktivitas vulkanik ing pulo Anak Krakatau punika dipunwiwiti ing taun 1927 dumugi taun 1929, kanthi thukulipun satunggal gundhukan ing kawah sisir laut minangka asiling érupsi. Prosen kolonisasi jinising tuwuhan saha satwa ing Pulo Rakata, Pulo Panjang, saha Pulo Sertung sampun mlampah dangu wiwit njeblug Gunung Krakatau ing taun 1883 dumugi sapunika. Déné, kolonisasi ing Pulo Anak Krakatau nembé lumampah 75 taun.[2] Ing pulo Anak Krakatau, ing gigiring gunung taksih gundhul laladanipun amargi suhu ing sakiteripun inggil saha kiranging toya ing laladan wau. Toya saged kapanggih ing jinising tuwuhan pioneer kados ta gelagah utawi ingkang gadhah nama latin Saccharum Spontaneum ingkang bersimbiosis kaliyan Azospirillium Lippoferrum. Ing pérangan ngandhap sampun dipuntuwuhi gelagah ingkang maujud saking asiling prosès pelapukan pasir ing laladan sakiteripun ingkang salajengipun badhé ngasilaken tuwuhan jinis Mellastoma Affine saha jinising tetuwuhan sanèsipun.[3]

Flora saha Fauna[besut | besut sumber]

Sapunika ing Pulo Anak Krakatau jinising flora ingkang wonten inggih punika kapérang dados 206 fungi, 13 jinis Licehens, 61 jinis paku-pakunan (Pterydophyta), saha kirang langkung 257 jinis Spermatophyta. Déné jinising fauna ingkang wonten kapérang dados jinis mammalia kados ta Rattus (tikus) saha Megaderma (kalong). Golongan Aves wonten kirang langkung 40 jinis saing ukuran ageng ngantos ingkang alit kados ta, Centropus Bengalensis, Coprimolgus Offinis, Falco Severus, Lalage Nigra saha sanèsipun. Golongan reptilia ingkang wonten kados ta biawak, penyu, ugi ula. Ula ingkang ageng kados ukuran Sanca ngantos ula ingkang alit ugi wonten ing pulo punika.[3]

Uga delengen[besut | besut sumber]

Cathetan suku[besut | besut sumber]

  1. [1] Anak Krakatau (dipunundhuh tanggal 4 Januari 2013)
  2. [2] (dipundhuh tanggal 4 Januari 2013)
  3. a b [3] Archived 2012-03-21 at the Wayback Machine. Menerjang Ombak, Menuju Anak Krakatau (dipunundhuh tanggal 4 Januari 2013)