Pitik alas abang

Saka Wikipédia, Bauwarna Mardika abasa Jawa / Saking Wikipédia, Bauwarna Mardika abasa Jawi
Langsung menyang: pandhu arah, pados
Pitik alas abang
Status konsèrvasi
Klasifikasi èlmiah
krajan: Animalia
filum: Chordata
kelas: Aves
ordo: Galliformes
kulawarga: Phasianidae
Genus: Gallus
Species: G. gallus
Jeneng binomial
Gallus gallus
(Linnaeus, 1758)

Pitik alas abang utawa kanthi jeneng èlmiyah Gallus gallus iku sajinis manuk kanthi ukuran sedheng, dawané watara 78cm, saka suku Phasianidae. Pitik betina ukurané luwih cilik, dawané watara 46cm. Pitik alas jantan duwé wulu-wulu gulu, tengkuk lan mantel sing dawa luncip werna kuning coklat keemasan kanthi kulit rai abang, iris coklat, wulu geger ijo peteng lan sisih ngisor awak werna ireng ngilap. Ing endhasé ana jènggèr mawa gerigi lan gelambir werna abang. Bututé kapérang saka 14 nganti 16 wulu werna ireng ijo métalik, kanthi wulu tengah buntut sing dawa lan mlengkung mudhun. Sikilé werna klawu ana jaluné siji. Pitik betina sikilé ora ana jaluné, wulu-wuluné cendhak, werna coklat tuwa semu kuning mawa garis-garis lan bintik peteng.

Pitik-alas abang kasebar wiyar ing alas tropis lan dhataran asor ing bawana Asia, saka Himalaya, Républik Rakyat Cina kidul, Asia Kidul-Wétan, tekan Sumatra lan Jawa. Ana lima subspesies sing ditepungi. Ing Indonésia, subspesies G. g. bankiva ditemokaké ing Jawa, Bali lan Sumatra.

Pitik-alas abang urip nglompok, pitik jantan karo sapérangan pitik betina. Ing ésuk lan soré, pitik metu golèk pangan ing salumahing lemah. Pakan pitik-alas abang kapérang saka anéka wiji-wijian, pucuk suket lan gegodhongan, srangga sarta manéka jinis kéwan cilik.

Pitik betina biasané netesaké watara lima nganti enam butir endhog werna coklat enom pucet utawa coklat semu abang. Anak pitik bisa mabur sawisé umur seminggu.

Pitik-alas abang diyakini minangka leluhur saka pitik ingon. Wiwit kapan pitik-alas iki didhomestikasi ora cetha, nanging pitik-pitik iku diternakaké wiwit peradaban Lembah Indus watara 5.000 taun kepungkur.

Salah siji manuk sing paling akèh ditemoni lan diternakaké, pitik-alas abang diévaluasikaké minangka kanthi résiko asor sajroning IUCN Red List.

Pranala njaba[sunting | sunting sumber]

Sumber artikel punika saking kaca situs web: "http://jv.wikipedia.org/w/index.php?title=Pitik_alas_abang&oldid=822398"